Дагъусттаннал Капитал ремонтрал фондрал тавакъю бунни МахIачкъалаливсса Учительская тIисса кIичIиравусса 11 А къатраву лифт ккаккан дурсса чIумуяр ччяни даххана дан.

Къатраву ялапар хъанахъими цимилагу фондрайн аьрзирай буккаву хIисавравун ларсун, 2027-ку шинал даххана дан аьркинсса лифт нанисса шинал даххана дан ккаккан бунни. Фондрал пишакартурал ххал дунни шиккусса лифт ва мукIру хьунни ванил чIун дурккун душиврий. Лифт зун аьркинну дур 25 шинай. Къатри дурну дур 1992-ку шинал.
ЦIанасса чIумал лифт дацIан дурну дур. Мунийну инсантуран, хаснува оьрмулул хъуниминнан, мушакъатминнан ва мюрщисса оьрчIащалсса кулпатирттан захIматшиву хъанай дур.

Капитал ремонтрал фонд баян буллай бур квартирардал заллухъруннайн, чIумуй капремонтрахсса взносру дулаврийну региондалул программа ччяни дузрайн дуккан дан бюхъантIишиву.
КIицI лавгсса къатраву, масала, капремонтрахсса взносру, так 66% дуллуну дур. Взносру цинявннал дулларча, лифтру даххана даву ва цаймигу давуртту чIумуй, чIумуяр ччянигума дан бюхъантIиссар. Агана квартирардал заллухъру мудан взносру къадуллай бухьурча, фондрахь ихтияр дуссар судрал органнайн бувккун ласун.

Андриана Аьбдуллаева