Дагъусттаннал Конституциялул кьинилул хьунийн Культуралул министерствалий хьунни паччахIлугърал ва ведомствалул наградартту дуллалисса шадлугъ.

Республикалул магьирлугъ хьхьичIуннай даврил ххуллий чIярусса шиннардий дакI тIайлану бувсса захIматрахлу хIалал дурсса наградартту дуллунни музейрдал, библиотекарттал зузалтран, театрал магьирлугърал ишккаккултран, магьирлугърал идарарттал зузалтран.

Наградартту дуллай культуралул министр Зарема Буттаевал кIицI лавгунни магьирлугърал аралуву хьусса гьарцагу хьхьичIуннайшиврул махъ бушиву цала пишалийн дакI тIайласса зузалтрал захIмат.
«Цавай буссар жула магьирлугърал авадансса ирс буручлай, цавай – хъирив нанисса никираву гьунарду аьч буллай, цавайгу – жула шагьрурдал ва шяраваллал магьирлугърал идарарттал даву хьхьичIуннай дуллай. Зул захIмат, пишакаршиву ва даврихсса ччаву хIалалссар хIурматран», – увкунни Зарема Буттаевал.

Ванил барчаллагь увкунни республикалул каялувчитурахь магьирлугърал сиптардан кабакьу буллалаврихлу ва магьирлугърал зузалтрал захIматран кьимат бишлай бушиврухлу.
Наградартту ларсминнавух бур А. Къапиевлул цIанийсса Лакрал паччахIлугърал музыкалул ва драмалул театрданул артистътал Ислам МахIаммадов ва Адам Гайдаев.

КIиннаннагу дуллунни «Дагъусттаннал лайкь хьусса артист» тIисса цIарду. Адам театрдануву зун увкIссар 2010 шинал, ванал цалчинсса ва хIакьинунингу агьалинал итталусса роль хьуссар «Хан-Муртазааьли» спектакльдануву Муртазааьлил роль. Ислам тIурча, театрданувун увкIссар 2015 шинал, ДГУ-рал культуралул факультетрал актертал хIадур байсса отделениялул студент Апанни Къапиевлул аьралий чичрурдал гьанулийсса «Невыплаканные слезы» спектакльдануву Апанни Къапиевлул роль дугьан оьвкуну. КIиягу артист гьурттуну бур агьамми рольлаву, кIиягу бусравну бур пишалул уртакьтурангу, тамашачитурангу.
Жугу, дакIнийхтуну кIидачIлай жула жагьилсса ва гьунар бусса артистътуращал ва хъуннасса ххаришиву, «Илчи» кказитрал редакциялул ва буккултрал цIания барча тIий буру ларайсса цIа.
ЧIа тIий буру ттигу чIярусса шиннардий миллат ххари буллансса цIуллушиву, даврихсса гьавас, творчествалуву тIайлабацIу ва хьхьичIуннайшивуртту!

Зулайхат Тахакьаева