Март зурул 17-нний «Совет Союзрал агьалинал дусшиву Буттал кIанттул цIанийсса Хъунмасса дяъвилийсса ххув шаврил гьанур» тIисса элмийсса конференция хьунни Москавлив Дунияллул халкьуннал машлул центрданий. Ва даврил сиптачигу, сакиншинначигу ия машгьурсса политик, паччахIлугърал ишккакку, Дагъусттаннал бакIчину ивкIсса Рамазан АьбдуллатIипов.
Конференциялий гьуртту хьуна щалва билаятрай ххуйну кIулсса паччахIлугърал вакилтал, жяматийсса ишккаккулт, динчитал, аьлимтал. Аьрасатнал Федерациялул кьатIаллил иширттал министр С. Лавровлул цIаниясса ссаламрал чагъар бувккуна, аьмну 32 инсаннал агьамсса масъалартту гьаз буллалисса ихтилатру бувна. Махъру лавхъуна Татарсттаннал ПаччахIлугърал Советрал председатель Ф. Мухаметшиннул, ПаччахIлугърал Думалул хъунаманал хъиривчу В. Шамановлул ва цаймигу бусравсса инсантурал. Аьрасатнал Жяматийсса палаталул вакил хIисаврай махъ лавхъуна Дагъусттаннал шяраваллил хозяйствалул министрну ва хъунисса цаймигу къуллугъирттай зий ивкIсса экономикалул элмурдал кандидат, Аьрасатнал шяраваллил хозяйствалул лайкь хьусса зузала, жула лаккучу Айгун МахIаммадовлул. Ванал гьарза-гьартану бувсуна Совет Союзрал кIийла Виричу АхIмад-Хан Султаннул оьрмулул ххуллия, гьунардая. КIицI лавгуна бусалардавун агьсса Виричунал цIаницIун дархIуну, хасну Къиримнал ва Дагъусттаннал агьалинал ва цаймигу регионнал дусшиврийсса арарду цIакь хъанай душиврия.
«Вава ххуллий бусрав-барчаллагьран лайкьсса давуртту дуллалисса ккуранни Республикалул АхIмад-Хан Султаннул цIанийсса Жяматийсса ккурангу. Ванил гьану бивзссар цIанакул Халкьуннал Мажлисрал комитетрал каялувчину зузисса Артур Исрапиловлул, АхIмад-Хан Султаннул буттал шяравучунал.
– Артур Исрапилов ттул даврил уртакьри, ЦIуссалакрал КПСС-рал райкомрай цачIу зий бикIайссияв. ПаччахIлугърал АхIмад-Хан Султаннул цIанийсса наградалул сиптачигу Артур Исрапиловри, вагу бюхттулсса инсаннал цIанил хIурмат бушиву ккаккан буллалисса давур. Жагьилтурал тарбиялул давриву хьхьичIунсса бутIа бивхьуминнан кьимат бищайссар АхIмад-Хан Султаннул цIанийсса медальданийну. Артур Исрапиловлул каялувшиврийну АхIмад-Хан Султаннул цIа гьаз дуллалисса давуртту хьуссар ЦIувкIравгу, ЦIуссалаккуйгу, Ваччавгу, Дагъусттаннайгу. Ярославль шагьрулий Виричунан гьайкал дацIан дуллалисса давурттавугу чялишну гьуртту хьуссар», – увкунни Айгун МахIаммадовлул.
Федерал лагрулул хъуни-хъунисса мероприятиярттай лак лакрая цIардай бушивугу, багьавай кьимат бишлай бушивугу жулва миллатрал хьхьичIуншивур.
ПатIимат Рамазанова
