Ларгсса ххуллункьини МахIачкъалалив, Редукторный поселокрайсса цIуну буллалисса мизитраву, лакку хъаннил мажлис хьунни. Ванил сиптачитал ва сакиншинначитал бия Дагъусттаннал Муфтиятрал просвещениялул хъаннил отдел.

Мажлис бачин бувсса журналистка ХIуризада Камаловал кIицI лавгуна мажлис хас бувшиву хъамитайпалул ссавурданун, аькьилшиврун ва кьадру-кьимат бурувччуну къуццу тIаврин.

«Жува хIакьину цачIун бавтIссару Аллагьу Тааьланал ва Ванал Илчинал (с.аь.с.) хъамитайпалун – ниттин, кулпатран, душнин ккаккан бувсса лахъсса кIанттуцIун бавхIусса гъалгъарду буван», – увкуна ванил. Аьдатрай мажлис байбивхьуна Кьурандалул аятирттая. Исламрал диндалул ххуллу цIакьну буруччин аьркиншиврия ва му давриву хъаннилмур биялагу агьамсса бушиврия ихтилат бувна ­аьлим МухIаммад Ансар Сулаймановлул. Ванал цала ихтилатраву кIицI лавгуна, оьрчIру тIайлану тарбия баврил масъала ца яла агьаммур бушиву, имандалийсса занакьулушинна дикIан аьркиншиву инсаннал циняв иширттаву: давриву, гьар дуллалимуниву, оьрмулуву. Иман тасттикь дуллангу аьркиншиву дуллалимунивугу. Увккуна ва ниттил маз хьхьичIунну бикIан аьркиншиврийнгу. «Миллат бакъассар мазгу, тарихгу бакъасса чIумал. ТIайласса ххуллу цумурдив тарихрал кIул байссар. КъакIулмур тIайласса аьлимтурахь, усттазтурахь цIувххуну, миллат тIайласса ххуллийх нанинийри барачат бикIайсса», – увкуна ванал.

Муфтиятрал хъаннил отделданул хъунмур Ирина Аьлиевал бувсуна жяматрал оьрмулул иширттавухгу хъами чялишну гьуртту хъанай бушиврия, кулпатирттаву инсаншиврул кьимат хьхьичIунну бикIан ва чиваркIуннаха хIурмат бикIан аьркиншиврия. Ванил кIицI лавгуна лакрал хъами гьармуниву хьхьичIунсса, итххявхсса бушиву, диндалул иширттавугу хьхьичIунну, хIала-гьурттуну къуццу тIий бушиву.

«Дин – Аллагьу Тааьланал жунма ликкан бувсса хъунмасса рахIму-цIимири, чак баву – жуйва бивхьусса буржри, хъиншивуртту, хъинбалартту буллай, жува ислам кьадру-кьиматрай ядуллай бушиву ялун нанисса никирангу ккаккан буллалиссару», – увкунни ванил.

Ттулвамур ихтилатраву нагу чIурчIав дурссия, гьалххасса къяртри чIярусса мурхь залунсса ттурцIал бугьайсса кунма, жувагу ниттил мазрал, буттал кIанттухсса ччаврил ва диндалул бувгьуну бушиву, исламрал кIулшивуртту куртIгу, цIакьгу дуллалаву – оьрчIру къаххуймуния байщун бувансса ва бяйкьусса ххуллийн буккан къабитансса чаранну хьунтIишиву.
Психолог, поэтесса Аьйшат Расуловал бувсуна къабигьасса ппурттуву хъамитайпалул цила цуппа бувгьуну ссавурданий яхI буван аьркиншиврия. Бувккуна ванил цила оьрус мазрайсса шеърирдугу.

Лакрал райондалул хъаннил отделданул хъунмур ПатIима Аьлиевал ва Ккуллал райондалул отделданул хъунмур ПатIимат Зиркьуевал цала ихтилатирттаву кIицI лавгуна исламрал дингу дуручлай, адаврай къуццу тIисса хъами махъминнангу эбратну хъанахъишиву. Дуллалисса дуаьрдугу, эбадатругу кьамул дувайшиву, агарда Аллагьу Тааьланайн хьул бивхьуну дакIнийхтуну дуллай бухьурча. Вара мяъна-мурадрайсса ихтилатру бувна цайми душвавралгу.
Мажлисрал программа авадансса дия: Зульфия Архилаевал ва Патимат Гавзиевал увкуна халкьуннал балайрду, «Бусинка» группалул душваврал МухIаммад Идавсин (с.аь. с) хас дурсса нашидру увкуна, исламрал кIулшивуртту ххал дуллалисса викторина дурна, жавабру дуллалиминнан бахшишругу дуллалисса.

«Этос» театрданул коллективрал ккаккан бувна кулпатраву кьиматрайсса ххазинардая ва ссавурдания асар хьунну бусласисса постановка. Цалчинмур классраву дуклакисса Мариям Дадаева миллатрал лаххиялуву бувккун, лакку мазрайсса шеъри бувккуна. КIуну бувккуну тIайлабацIу хьусса душнил дурххуна Оьмралийнсса путевка. Ва Кьубатусса Асаева ПатIимат бия. Арулла шинавусса Райянка Расуловал дурххуна ттучандалия маша бувансса сертификат. Дия цаймигу бахшишру.
Душваврал хIадур дурну дия кIарттул ччатIуя тIайла хьуну хьхьахьхьарттуйн бияннийнсса лакку дукрарду. Махъ лахъан хьхьичIун бувксса душвавран хIадур бувну бия ххаллилсса тIутIал кацIру.

Мажлисрайн бувкIцириннайх дарчIуна лакку мазрайсса калимартту: учалартту, зукьлурду ва дуаьрду дусса чIапIив. Ттун багьуна укунсса зукьлу: «Ччаву, аякьа, марцIшиву даиман зущал дикIаннав!».
Мажлис бачин бувсса журналистка ХIуризада Камаловал бакIрайва, мажлис дакIурдиву иман цIакь дувансса ва чаннайн буккансса чаранну хьуннав тIисса, дуаь дурна. Ва тIайладарцIуссар тIий бура, тIайладарцIушиврул хIуччарду бивкIун тIий мажлис къуртал хьуну махъгу сакиншинначитурачIан гъан хъанай, барчаллагь тIий, мадарасса хъами хъямала багьлай бивкIшиву. ХIатта иттав макь гьузиххи хьусса бивкIшиву му ппурттуву.

Ва мажлис кьамул баннав Аллагьу Тааьланал. Ва лайкьсса даражалий тIайла буккан хIарачат бувсса, гьармунилсса буллай чялиш бувккун бивкIсса душваврал захIмат миллатран барачатну хьуннав, вайннул давурттаягу, жуятувагу Аллагь рязину личIаннав.