КIулсса куццуй, 2016-ку шиная шинмай лакрал щархъал жагьилтал «Лакку кIанттул Кубокрал» ва «Лакку кIанттул Лигалул» лагрулий гьарца интту ва ссуттил буклакиссар лакку футболданий.

ДукIусса шин лакрал футболистътуран дия юбилейралмур. Гьашинуми тIуркIурдурив хъанахъиссар 11-ми. Гьарца ссуттил шайсса Лакрал Лигалул бяст-ччаллал гьашинуми тIуркIурду цIананин бачIи хьуссар учин бюхъанссар.

Аятуллагьлул 400 гол

Махъсса кIира нюжмардий Лакрал Лигалул Цалчинмур дивизиондалул командартту дурккунни кIира турданий, Суперлигалул командарттугу – ца турданий. Ларгсса алхIаткьини Цалчинмур дивизиондалул лагрулий ччаллий дурккунни Гъази-Гъумучиял (Лакрал район) ва Ялув ЧIатIлухъиял (РутIуллал район) командартту. Ххув хьунни Ялув ЧIатIлухъиялми футболистътал. Гъази-Гъумучиял командалул ва цалчинсса бух шавур. Ваних къабурувгун, Гъази-Гъумучиял команда личIлай дур Цалчинмур дивизиондалул язимур командану ва чемпионатрал лидерну.
Ва турданий Ялув ЧIатIлу­хъиял командалул игрок Аятуллагь ХIажиевлул бавкьунни Лакку кIанттул Лигалул лагрулийсса, лакку футболданий буклай байбивхьуния шинмайсса цала 400-сса гол. Вайксса голлу бавкьусса цама акъассар, ва рекордсменни. Цимивагу тIуркIулий Аятуллагь ккаллину ивкIссар «Язима бомбардирнан».

– На ттулла аьзизсса шяраваллил – Ялув ЧIатIлухъиял командалуву футболданий уклай 11-сса шинни. «Лакку кIанттул Кубокрай» жул команда кIилла ххув хьуссар – 2020-ку шинал ва дукIу, 2025-ку шинал. Ттул тачIаввагу бакъассия язима бомбардир хьунсса мурад. Турнирдай къачансса голлу бакьлай ухьувкун, ччан бикIайва общекомандный хIасиллу ларайсса дуну. Аллагьнайн щукру, мукун хьугу-хьунни. Жул командалул мукунма лавсъссар Сурхай-ханнал Кубокгу. 400 гол бакьавурив цийнува цуппа хьунни. Мини-футболданий уклакиссаксса хIаллай жул команда ххишалану атакардай, чанну обороналий дур. Навагу нападающийну уну, голлу бакьлакьиссаксса хъиннува чIявусса бакьлан, ттула хъирив левчуну наниминнаяр хьхьичIун уккан ччан бикIайва, – тIий ур Аятуллагь.

Яла цIа дуркмур бяст-ччал – Ккуллал
ва Ххутрал дянивмур

ЦIанасса чIумал бяст-ччаллай дур бакIрайра диркIсса 19 командалувасса 13. «Лакку кIанттул Кубокрал» ва «Лакку кIанттул Лигалул» Сакиншиндарал комитетрал каялувчи, Шахьуйннал командалул капитан Руслан ЖахIпаровлул буслай, гьашинумур дивизиондалуву ххишала дакъа гужсса конкуренция, бяст-ччал бур хьхьичIунсса кIанттахлу. Ва ларгсса бигьалагай кьини хьусса Суперлигалий хьунни лакрал футболдануву ца яла цIа дуркмур, яла дакIний личIанмур бяст-ччал, баранбал буккаву – титулованный командарттан ккаллисса, Лакку кIанттул Лигалул мукьийлла чемпион хьусса Ккуллал командалул ва шамийлла чемпион хьусса Ххутрал командалул дянив. Вай кIирагу команда ва сезондалий цаллагу дух къархьуссар. Суперлигалул бяст-ччаллаву 3:2 счетрайну ххув хьунни Ккуллал команда. Трибунардай цалла командалухлу дакI цIий, буклай, гьура-гьайта тIий бия чIявусса ккул, укунсса болельщиктал буний бух хьунгу къабучIия.
Шиккува кIицI лаган, Цалчинмур дивизиондалул язима бомбардирнан, «Турнирданул ца открытиялун» ккаллину ур Рамазан ХIусманов («Ккул-2» команда).

«Ккул – Ххут» тIуркIулул язима игрокнан ккаллину ур Шамил Аьлиев (Ккуллал команда):
– «Лакку кIанттул Кубокрайгу», «Лигалийгу» цимилгу ххув хьусса Ххутрал командалул ччянива ккаккан бунни цилва лавайсса даража, усттаршиву. ТIуркIурдал чIумал ччимур хьун бюхъайссар, куннан кув къабувчIлачIавугу, ттярзлийсса ихтилатругу, куннайн кув щавугу. ТIуркIурдая махърив циняв командарттачIа личIайссар так куннал кунначIансса хIурмат. Лакку кIанттул Кубокрал ва Лигалул турнирдайн бувну жагьилтураву цала-цала шяраваллищалссагу, цайми шяраваллащалссагу дахIаву цIакь хъанай дур, футбол сававну вай жагьилтал куннащал кув дус хъанай бур. ТIайламур бусан, цаппарасса лакрал щархъал цIарду ттун ва турнирданийн бувнур кIул хьусса. Лакку футболданул жуя ца хъунмасса лакку кулпат бунни, – тIий ур Шамил.
Тти командарттан ливчIунни кIива тIуркIулий буккан. Ноябрьданул ахирданий личIантIиссар 8 язисса команда, цивгу декабрьданул ахирданийннин дуклантIисса призовой кIанттурдахлу. Турнир най дикIантIиссар декабрьданул 20-ннин. Уттинин хьуми тIуркIурдаву хьхьичI дур Ккуллал ва ЦIуссаккуллал командартту, вайннул хъирив – Ххутралсса.
ЧIа учинну жагьилтуран тIайлабацIу. Цу ххув хьурчангу, цу ух хьурчангу, щак бакъа, ххув хьумурну личIантIиссар дусшиву.