Залихха бувну бур СунбатIлиясса Рамазаннул ва ПатIиматлул кулпатраву, колхозру дуллалисса шиннардий. Рамазан ччяни аьпалул хьуну, ПатIиматлун багьну бур 3 душ хъунигу буван, ласкъатралгу буван. ПатIимат бия захIмат ххирасса, цила тIювахаллилссагу найрдалссагу буллалисса хъамитайпа.
Залиххал 7 класс къуртал бувсса шинал, ПатIиматлул ва щар буллуна дахьва 10 класс бувккусса ятиннан, МахIаммадхIусайннун. ПатIиматлул ва Залиххал куявнан кумаг бувна Дагъусттаннал Шяраваллил хозяйствалул институтрал агрономтал шайсса факультет къуртал буван. Та чIумал пенсияртту, пособияртту къабикIайва, мунияту вайннал куявнан кумаг байва хъувату дуркIмур ва ятту, ницI дахлай хьусса арцуйну.
Институтгу, аспирантурагу бувккуну махъ МахIаммадхIусайннуя хьуна шяраваллил хозяйствалул элмурдал кандидат. ЦIубутIуй ва зий икIайва Дагъусттаннал НИИСХ-раву аьлимчуну, яла – Къизлардал ва Нугъайнал районнайгу.
МахIаммадхIусайннул ва Залиххал душнил ХIавал, Ваччав 10 классгу бувккуну, МахIачкъалалив къуртал бувуна Медициналул училище. Зий бия Республикалул Хъунмур азарханалий (РКБ) хирургиялул отделениялий медсестрану. ХIава щар хьуна паччахIлугърал цIа дурксса ишккакку Амучи Амуттиновлул арснан.
Залиххал 50-ллийсса шинну хьуна колхозраву, бакIрай бригадалул звеневойну, яла бригадирну зий. Ванин лавхьхьуна агрономнал пиша.
1986-ку шинал на зий уссияв колхозрал председательну. Ссуттил лачIа къаххявхсса 8 гектарданий Залиххал бувгьуна викалул (лазундаран дугьайсса урттул) ва нехълул хIалашиву (вико-овсяная смесь). Миннул хъуннасса бакIлахъругу ларсъссия. Тара шинал, Нугъайнава лавсун, Лаккуй бувгьуна ссуттил сус, ца гектардания ларсуна 42 центнер сусул, нувщул ца гектардания – 370 центнер.
ХIукуматрал председательнал хъиривчу МахIаммадтIагьир Аьбдулбасировлул Залихха ккаккан бувну бивкIссар Москавлив ВДНХ-лийн гьан. Амма Шяраваллил хозяйствалул министерствалул ванин кIанай Кьакьа-Щурагьиял колхозрал председатель гьан увна.
Залиххал бувсса захIматран партиялул ва хIукуматрал лайкьсса кьимат бивщуна. Залихха бакIчисса къурнил бригада 18 шинал мутталий буссия райондалул хIурматрал улттуйн лахъан бувну. Ва буссия 12 шинай КПСС-рал райкомрал бюрорал членну ва райсоветрал депутатну. Ванин кIийлла дуллуссар «Ударник коммунистического труда» тIисса хIурматрал цIагу, лишангу, 1970-ку шинал — «В.И. Лениннул 100 шин» тIисса медаль. Залиххан дуллуссар колхозрал правлениялул, райондалул Шяраваллил хозяйствалул управлениялул бахшишругу, Дагъусттаннал Шяраваллил хозяйствалул министерствалул ХIурматрал грамотарттугу.
Залихха бия хъинсса насихIатчигу, маслихIатчигу, Культуралул къатрал художественный самодеятельностьрал гьурттучигу.
