Ккуллал райондалул Культуралул управлениялул зузалт гьуртту хьунни «Блокадалул ччатI» тIисса щалвагу Аьрасатнал акциялувух. Гьашину 81 шин там хьунни Ленинград фашистътурал блокадалуща мурахас бувну. Тарихраву агьамсса кIану бувгьусса кьинилун хас дурсса мероприятие кIицI ларгунни Культуралул управлениялул хIаятраву тIивтIусса, дяъвилул иширттаву ва къуллугърал бурж биттур буллай жанну дуллусса Вирттаврал аьпа абад буллалисса аллеялий.

Акциялул агьаммур мурад хъанай бур ялун нанисса ник патриот зумуну тарбия даву, Буттал КIанттул цIанийсса Хъун дяъвилул яла къучагъмур ва захIматмур лажин хъамакъаритаву.
Шикку дуклаки оьрчIахь бувсунни Ленинградуллал агьалинал дурсса чувшивурттая, захIматсса кьинирдая. Жула тархъаншиврул цIаний жанну дуллуминнал аьпалун баян бунни минутIрайсса пахъ багьаву.
КIицI лаган, гьарица шинах акция бувайссар Буттал КIанттул цIанийсса Хъунмасса дяъвилий жанну дуллуми дакIнин бичаву, жагьилтал Ватан ххирану тарбия баву, миннавун жула тарих ва культура ядансса гъира бутаву мурадрай.