Дагъусттаннал Росгвардиялул МахIачкъалаллал соединениялий ца зуруйсса стажировкалий буссия Аьрасатнал нацгвардиялул И.К.Яковлевлул цIанийсса Новосибирскаллал аьралий институтрал командный факультетрал курсантътал.
ХIаписартал хьун нанисса курсантътал практикалий бия взводрал командиртурал къуллугъирттай МахIачкъалаллал соединениялул хасъсса моторизованный полкрал ОБОН-далуву. Институтраву ларсъсса кIулшивурттугу иширайну цIакь дуллай, курсантътурал ххал бивгьунни подразделениярттал гьарица кьинисса даврил норматив база, аьралий частирдавуминнащал дунни боевой ва строевой хIадуршиннарал занятияртту. Мукунма вай бия къуллугъ буллай аьралуннал нарядирттащал. Аьралий стажировкалул агьаммур программалий ккаккан бувмуницIун, курсантътал хьунабавкьунни профильданул классирттал дуклаки оьрчIащал. Бувсунни миннахь аьралий вузравусса дуккаврия, лавайсса даражалул аьралий кIулшивуртту ласаврил къулайшивурттая. Вайннал ххал бунни «Россия – моя история» комплекс ва МахIачкъалаливсса театрду, кIул хьунни Дагъусттаннал культуралул ирсиращал.
Курсант Владимир Добронравовлул бувсунни оьрчIнияцIава аьралийчу хьунсса хиял бивкIшиву ва чIун дирукун цанма ччисса пиша язи бувгьушиву.
– Аьралий къуллугъ – му бур Ватандалийн ва цала пишалийн дакI тIайласса, цила бикIайкунсса арамтал тарбия буллалисса оьрмулул школа. Жагьилтурангу на маслихIат бавияв цала оьрму аьралий къуллугърацIун бахIин. Новосибирскаллал аьралий институтрая тIурчарив, му Сибирнал пахрур, хIаписартал хIадур байсса идарар, – увкунни Владимир Добронравовлул.
МахIачкъалаллал соединениялул ОБОН-далул хIаписар, капитан Денис Поповлул кIицI лавгунни курсантътурал стажировкалул циняв мурадру бартбигьин бювхъушиву.

Андриана Аьбдуллаева