Ваний гьуртту хьунни Дагъусттаннал ХIукуматрал хъунаманал хъиривчу Муслим Телякавов, культуралул министр Зарема Буттаева, шагьрурдал ва районнал магьирлугърал идарарттал каялувчитал.

Коллегия тIивтIунни Муслим Телякавовлул. Ванал бувсунни ларгсса шин культуралул оьрмулуву авадансса хьуну душиву Буттал кIанттул цIанийсса Хъунмасса дяъвилий Ххувшаву ларсун 80 шинацIун бавхIусса иширттайну.

«Ххувшаврил 80 шинал юбилейрал агьамсса даталуцIун дархIусса мероприятияртту дан хъуннасса хъар дуссия магьирлугърал идарарттай ва зузалтрай», – увкунни Телякавовлул. Ванал кIицI ларгунни Ххувшаврил байрандалул хьунийн ва 9-мур Майрал кьини хьусса мероприятиярттал лагру.
ДакIнин бутанну, Ххувшаврил 80 шинал лагрулий ДР-лул бакIчи Сергей Меликовлул кабакьулуцIух цIу буккан був­ссар В. Макаровал цIанийсса Аьралий савлугърал музей, гьарта-гьарза дурссар шивусса экспонатру.

Мукунна дурссар Буттал КIанттул цIанийсса Хъунма­сса дяъвилун ва хасъсса аьралий операциялун хас дурсса кинофестивальлу, библиотекарттал ва музейрдал проектру.
Ялун дуркIсса 2026 шинал агьамшиву вице-премьернал кIицI ларгунни му билаятрай Аьрасатнал Халкьуннал цашиврул шинну баян бувну бушиву.
«Билаятрал Халкьуннал цашиврул биялалийнур жула суверенитет ва мюхчаншиву дуручлачисса, билаят хьхьичIунмай хъанахъисса. Цашиврувур жула билаятрал гужгу, кьуватгу бусса. Му цашиврул гужирайнур жущава душман ххит ан бювхъу­сса, хIакьинугу хасъсса аьралий операциялий ххувшаврийн нанисса», — кунни Муслим Телякавовлул. Ванал бувсунни Аьра­сатнал Халкьуннал цашиврул шинан хас дурсса мероприятиярттал план цIакь дурну душиву республикалул бакIчи Сергей Меликовлул.

Агьамми мероприятияр­тту хьунтIий дур Дагъусттаннал Халкьуннал цашиврул кьини, цурдагу гьашину жула республикалий ацIния ххюйлчин кIицI лаглагиссар.
Ихтилат къуртал буллай, Муслим Телякавовлул магьирлугърал зузалтрахь дакI тIайласса захIматрахлу барчаллагьгу куну, дуллунни паччахIлугърал наградартту.

Муния махъ Зарема Буттаевал гьарза-гьартану бувсу­нни ларгсса шинал магьирлугърал оьрмулуву хьусса агьамсса иширттая: Ххувшаврил 80 шинал лагрулий дурсса давурттая, хасъсса аьралий операция нанисса чIумул мутталий аьралийтурал чIарав бацIулул ххуллий­сса давурттая, культуралул идарартту цIу буккан баврил ххуллий дузрайн бувксса проектирдая, «Земский работник культуры» проектрая, «Культура малой Родины» проектрал лагрулий дан бювхъусса мероприятияр­ттая, республикалий «Пушкинская карта» программа зузаврия, шинал лажиндарай кIицI дур­сса хъуни-хъунисса юбилейрдая, Аьрасатнал лагрулийсса мероприятиярттай дурсса гьурттушиннарая. Балжийну бувсунни ва шинаву дан дакIнийсса давурттаягу. Муния махъ министр­нал республикалул магьирлугъ хьхьичIуннай даврил хху­ллий бувсса захIматрахлу культуралул идарарттал зузалтрахь барчаллагьгу куну, дуллунни ведомствалул чулухасса наградар­тту. Миннавух бия Ккуллал райондалул Культуралул управлениялул каялувчи Марина Ибрагьимовагу.
Жугу дакIнийхтуну барча буллай, Марина Ибрагьимова «Илчилул» редакциялул ва бу­ккултрал цIания, чIа тIий буру ванин давриву хъуни-хъунисса хьхьичIуннайшивуртту.

Зулайхат Тахакьаева