Ватан дуруччул байрандалул гьантрай ЦIуссалакрал райондалул ДучIиннал 2-мур школалий хьунни шяравасса аьралий иширттаву гьуртту хьуминнащалсса хьунабакьаву.
Бусравсса хъамаллуравух бия хасъсса аьралий операциялия зана хьусса Джанарслан Закаев, Германнаву къуллугъ буллай бивкIсса совет аьралуннал ветеран АхIмад Мамаев. Вайннал бувсунни дуклаки оьрчIахь цала къуллугърая, ярагъунния, саллатIнал оьрмулия, жавабру дуллунни миннал суаллахьхьун. ОьрчIан хаснува асар хьунни аьралийтурал цивппа оьрчIаясса чагъардал цукун ххари буллай бивкIссарив бусласиний. Ахирданий дуклаки оьрчIал суратру рирщунни хъамаллуращал. Укунсса мероприятиярттал тарбия дуллалиссар ялун нанисса никираву Ватандалухсса ччаву. Укунсса къучагътал хъанахъиссар оьрчIан яхI-къириятрал ва чувшиврул эбратну.
