МахIачкъала шагьрулул Мажлисрал председатель Марис Илиясов хьунаавкьунни хасъсса аьралий операциялий жан дуллусса Вагьаб Багьауттиновлул кулпат Майсаратлущал ва вайннал душ Мисайщал.

ХIакьинусса кьини Майсарат бур хасъсса аьралий операциялий гьуртту хъанахъисса аьралитуран янна дурухлахисса «Зов Героев» тIисса цех тIивтIуну. ЦIана ванил цехраву СВО-лийн гьан буван хIадурну бур аьралитурансса гъилисса гьухъри, жулартту ва дахьра ца лажин дакъа къачIалачIисса куклусса кьяпри. Майсаратлул буллалисса захIматран лайкьсса кьимат бишлай, МахIачкъала шагьрулул Мажлисрал депутатътурал чулуха Марис Илиясовлул ванин дуллунни ХIурматрал грамота ва аьра­литуран яннарду дуруххаврин кумаг хIисаврайсса арцу.

– ХIакьину ттунма хъунма­сса талихI хьушиврун ккалли буллай ура, цила ласнал аьпалун хас бувну, аьралитуран янна дурухлахисса цех тIивтIусса уздан­сса хъамипайлущал хьунаакьаву. Барчаллагьрай ура дард-ххажалатрал лахIан къабувну, цайминнангу эбратну, яхIлувну оьрму бутлатисса хъамитайпалуйн. ЧIалай бур хIакьину хасъсса аьралий операциялий къучагъну талатисса аьралитурал кулпатру, ниттихъул, ссурвал вайннахава лавхьхьусса бушиву.
ХIарачат булланну виричу­сса хъамитайпалун гихунмайгу жущава шайсса кумаг буллан, – увкунни Марис Илиясовлул.

Имара Саидова