![](https://ilchi.info/wp-content/uploads/2020/05/Хъат-150x150.jpg)
Ххирасса «Илчилул» дустал!
ХIакьину жулла ялун дуркIун дур бигьадакьасса чIунну. Жунгу вай махъсса кIива зурул лажиндарай багьунни кказитрайгу, сайтрайгу,
группалуву жула республикалий ва щала дунияллийра хIасул хьусса тагьардания буслан. Ялун дирсса цIуцIаврил бивщуми жулгу, зулгу лагма-ялтту чIяву хъанай бухьувкун, ламус хъанайгу бия тяхъашивурттая буслан. Амма ва видео дикъархьуну бацIан къавхьунни ттуща.
Хъусращиял шяраваллил ансамбль «Хъат-хъат» ххаллилсса шаэр, композитор, музыкант ва балайчи, бюхттулсса даражалул педагог, «Дагъусттан Республикалул культуралул лайкь хьусса ишккакку» тIисса цIанин Ккуллал райондалий цалчин лайкь хьусса Камалуттин КьурбанмахIаммадовлул аьпалун хас бувсса мажлисрай. Ва духьунссар 2003 шин. КIива журасса асардал дуцIлай дур дакI ва видео ххал дуллалийни -ххариссагу, пашманссагу. Ххаришиву дур жула миллатрал культуралул авадансса ирс бушиврая. Пашманшиву тIурча- шамлийну ххишаласса. Цалчин, гьивч багьансса кIану бакъа бувцIусса клуб чIалай, дакI къума лаглай дур-зунттал кIанттурдайсса цайми щархъурдал кьадар ттул буттал шяраваллил бакIрачIангу бувкIун бушиврия. ХхялтIа дуклай дур гьантлия гьантлийн-бугьарами жуятува лаглай, жагьилми миха-тиха бишлай. КIилчинсса пашманшиву- ва сахIналийсса инсантурава цая-кIиясса акъа ливчIун акъар. Ттигъанну аьпалухьхьун лавгунни укун ххаллилну мандолинагу бишлай, балай тIутIисса Акаразуев ХIасанбаг. Дакъаривла ляличIисса такьва ваналгу, ванацIун бахIлахIиминналгу?! Исвагьисса шаттирал заллу тIурча Мюрщиев Ярагъи, лакран хъинну кIулсса музыкант Мирза Мюрщиевлул бутта, ччянива батIул хьунни жуятува. Ва ялагу чIявусса, цив бакъашиврия дуниял махIрумну ливчIсса. Яла хъунмур къумашиву ссая дур чирча-вай инсантал яла лагаврищал мискин шаврия жула буттахъал ирс. Акъая вайннавасса цаягу балай учаврийну я авадан, ягу машгьур хьусса. Амма жунма кьабивтун бур багьа бакъасса ххазина, цуксса хIайпнугу жущава ябан къабювхьусса. Бургирала исвагьишиву къавтIалтрал шаттирал! Бакъар хIакьину лакран лакрал тахъяшивурттай лакку зумуну къавтIун бизан ччай. Бат хьуну ларгун дур ва кьяйдалий исвагьисса шаттирал магьирлугъ, кIура дарну дур му тIанкI-шанкIлийн. ХIайп, жуламур чунчу тIий, чилмур нахIу лачIлачIаву.
Бюхъай чIявуссаннан пикри багьан, тти вагу ссая гъалгъа тIий бур, агьали цIуцIаврил бас буллалисса чIумал, тIисса.
Ттуршукурдал лахъишиврий жула буттахъал дурхIуссар цIуцIавурттугу, дяъвирдугу, амма мукунсса чIуннардийгума бурувччуссар миллатрал ирс. ИншаАллагь цIуцIаву яла гьантIиссар, жувагу кIура баянтIиссару жула вардишсса оьрмулийн, буллантIисару хъатIивгу, мажлисругу.
ТIааьнсса хьуннав зул бургаву, ххирасса буккулт!
Нагу мудан зун хъиншивуртту чIа тIисса
Зулайхат Тахакьаева.
Бурувччуну лякъиннав Заннал зугу, зул лагма-ялттуциригу!