Каспийскаллал Республикалул КIулшиву дулаврил центрданул (РЦО) 9-мур классраву дуклакисса Роза Къушиева ххув хьунни щалвагу Аьрасатнал лагрулийсса «Лектортурал школалул лига» тIисса конкурсрай. Ва ГьунчIукьатIатусса Мамайл ва Жаннал душ бур.
Конкурсрай гьуртту хьуну бур 5000-нниха ливчусса дуклаки оьрчIру. ТIайлабацIу буну, мукьрагу ятIапрай хьхьичIун бувккун бур Роза, ххув хьусса 20-вух вагу бур. Конкурсрал сиптачину дур Аьрасатнал «Знание» тIисса ккуран.
Конкурсрал финал хьуну дур майрал16-нний, ххув хьуми барча буллалисса церемониягу хьуссар Москавлив «Россия сегодня» тIисса пресс-центрданий. Розал лекция бувккуну бур Дагъусттаннал оьрчIан оьрус маз лахьхьин буван республикалийн бувкIсса оьрус учительницахъан цуку-цукунсса захIматшивуртту ккаркссарив бусласисса.
Роза Къушиева барча бунни цала Телеграм-каналданий Дагъусттаннал БакIчи Сергей Меликовлулгу.
Гьунар бусса лаккудуш уттинингу ххув хьуну бур Аьрасатнал ва Дунияллул халкьуннал лагрулийсса конкурсирттай, олимпиадарттай. Ва литературалул, музыкалул итххявхсса душ бур, Каспийскаллал музыкалул школагу къуртал буллай бур.
Жугу, дакIнийхтуну барча буллай, чIа тIий буру цIу-цIусса ххувшавуртту, творчествалул дунияллийсса хьхьичIуннайшивуртту.
