[dropcap]М[/dropcap]ай зурул 6-нний Ккур­ккуллал шяравугу, гьар мудан кунна, лавайсса даражалий ларгунни «БивкIу бакъа­сса полк» тIисса акция. КIицI лаган, «БивкIу бакъасса полк» акция Ккурккуллал школалий ччянира, щалагу билаятрай дулланнин, аьдатравун дагьну диркIссар. Ванил сиптачину хьуссия ххаллилсса педагог ва патриот Даниял Магьдиев.
Гьашинусса мероприятиялул сакиншинначину бия шко­лалул завуч Дианат ХIус­манова.

Шяраваллил майданнив кIюр­ххила бавтIун бия хъуними ва мюрщими. Дуклаки оьрчIру бия аьралуннал янналуву. Лагмава лавхъун бия ятIул ттугъру, дяъвилул вирттаврал ва аьрая зана къавхьуминнал суратир­ттащалсса стендру, дяъвилул лахIзарду ккаккан буллалисса плакатру. Шяравух лехлай бия жула халкьуннан нукIува ххира хьусса дяъвилул балайрду. Ца лахIзалува тIуркIу тIисса оьрчIру ва ккура- ккуранну дурну жапрайсса хъуними микI лачIун бунни Хъунама главнокомандующий И.Сталиннул дяъви байбивхьушиву бусласисса баян баврил.

Хъирив «Кьурукьру» балайлухун дуклаки оьрчIру був­ккунни шяраваллил майданналул лагма, Ватан душманная дуручлай бивкIсса цала-цала гъанчунал суратругу дургьуну. Акция къуртал шайхту жямат Ххувшаврил кьинилущал барча буллалисса ва та дяъвилул иширттая бусласисса ихтилатру хьунни. Хъирив цинявннал тIутIив дирхьунни Буттал КIанттул цIанийсса Хъунмасса дяъвилий талай бивкIминнансса гьайкалдануцI. Дуклаки оьрчIал бюхттулну кIицI дунни дяъвилия зана къавхьусса цинявппа ккурккуллал цIарду.
ДакIнийн бутан, Ккурккуллал шярава дяъвилийн лавгссар 128 инсан, 57 зана къавхьуссар.
ДакIнийссару, пахрулий бу­ссару.