Вай гьантрай Дагъусттаннай хIасиллу дунни мушакъатшиву дусса оьрчIал дянив най бивкIсса «Абилимпикс» тIисса пишардал усттаршиву ккаккан даврил чемпионатрал. Шикку гьуртту хьунни цIуллушиврул ссуссукьушиву дусса 150-хъул жагьилсса пишакар. Пишалул усттаршиву ккаккан дуллалисса 22 журалул бяст-ччаллу хьунни МахIачкъалаливсса ва Хасавюртливсса кIулшивуртту дулаврил идарарттай.
Ва ххуллухсса бяст-ччаллаву личIи унни 81 призер: 27-ннал бувгьунни цалчинсса кIанттурду, 30-ннал – кIилчинсса кIантту ва 24 гьурттучинал бувгьунни шамилчинсса кIанттурду.Соревнованиярттал лагрулий хьунни личIи-личIисса пишардал магьиршиву ккаккан дуллалисса мастер-классру.Шиккусса шанмахъул «ккуркки столлал» давуртту дия жагьилтал давурттал дузал баврин, пишардал хасъсса кIулшивуртту дулаврин ва цIуллушиврул ссуссукьушиву дусса инсантурал мюхчаншиву дуруччаврин хас дурсса.
Июнь зурул 10-нний бяст-ччаллаву ххув хьусса пишакартуран дулунтIиссар медаллу, дипломру ва бахшишру.
Соревнованиярттай ххув хьусса пишакартал Дагъусттаннал чулуха гьуртту хьунтIиссар Москавлив хьунтIисса Миллатирттал чемпионатрай.
