Май зурул 31-нний МахIач­къалалив Оьруснал театрдануву хьунни Дагъусттаннал халкьуннал шаэр Фазу Аьлиеван 90 шин шаврин хас бувсса литературалул мажлис – «Ччаврил ва дакьаврил чIу» тIисса цIанилу. Ванил сиптачитал бия Республикалул Муфтиятрал биялдарай­сса идарартту: Да­гъусттаннал гуманитар институт, Гуманитар-педагогикалул колледж, Башларовлул цIанийсса медициналул колледж, Юсуповлул школа, школа «Ватан» ва Хъаннил центр «Гьидаят». Гьуртту хьунни национал политикалул ва динийсса иширттал министр Энрик Муслимов, физическая культуралул ва спортрал министр Сажид Сажидов, Халкьуннал Мажлисрал Комитетрал хъунаманал хъиривчу Елена Мельникова, оьрчIал ихтиярдалсса буллалисса вакил Марина Ежова, Дагъусттаннал Хъаннил союзрал хъунмур Интизар Мамутаева ва интеллигенциялул вакилтал, жяматийсса иш­ккаккулт, журналистътал.

Литературалул мажлисрай Фазу Аьлиевал оьрмулул лахIзарду ккаккан буллалисса мюрщи пьесарду хIадур бувну бия студентътурал: Литературалул институтравун бухлахисса чIун, хьунтIисса ласнащалсса хьунабакьаву, ппу дунияллия лаглагисса кьини ва цаймигу.

– Фазу Аьлиева – ххаллилсса зунттал душри, нинур, яхIлувсса хъамитайпар. Ванихсса бургаврийну зунттал хъамитайпалул сипат хIасул шайва инсантураву, ванил лаххиялийну, зана-кьулушиндарайну, къуццулийну. Творчествалул чулуха гьунар сахаватну буллусса бия, – увкуна Энрик Муслимовлул. Бувсуна Фазу Аьлиевал «ккулла чув пIякь учирчагу, ниттил дакIницIунни щайсса» тIисса ххару мудангу агьамшиву ду­сса калиману личIантIишиву, хIакьину Украиннаву спецоперация нанисса ппурттувугу му калима асар хъанай душиву.
Интизар Мамутаевал кIицI лавгуна Фазу Аьлиева кумаг аьркиннийн анавар буккай­сса бивкIшиву, ванил тарбиялул гьану хъунна-бавал бивзшиву, дуниявийсса ябитаву дунияллух дунугу, поэтесса исламрал ххуллу-ххуттай бавцIусса, Кьурандалувасса аятру тикрал дуллан ххирасса инсан бивкIшиву.

Дагъусттаннал Муфтинал маслихIатчи Айна ХIамзатовал бувсуна Фазу Аьлиева къашай хьусса ппурттуву, щайх АхIмад Апаннинал цуппа муничIан Кьурандалул луттиращал гьан бувшиву, амма поэтессал му Кьурандалул лу цама инсаннан пишкаш бувну бивкIшиву ва махъ пашман хьуну бивкIшиву цаманан булаврияту.
– ХIакьину ва Кьурандалул лу на зана битлай бура Фазу Аьлие­вал арснахьхьун, – увкуна ванил. Поэтессал арс, «Лезгинка» ансамбльданул гендиректор Жамбулат МахIаммадовлул махъ буллуна Кьурандалул лу ирсирай ябуван.