[dropcap]М[/dropcap]ахIачкъалалив, КIулшиву дулаврил управлениялул сипталийну, ч1яру профиллал 5-мур лицейраву хьунни «Гамзатовские чтения» тIисса элмийсса конференция. Ва хас дурну дия Да­гъусттаннал Халкьуннал шаэр Расул ХIамзатовлул 100 шинан.

Конференциялул лагрулий лицейрал коллективрал ва дуклаки оьрчIал цачIуну тIивтIуну бия «литературалул къатта». Ккаккиялун дирхьуну дия шаэрнал оьрмулия ва творчествалия бусласисса суратру, луттирду ва кьай-кьуй. Мукьва-ххюва журалул номинациялий дуклаки оьрчIан ккаккан дан багьлай бия цала кIулшивуртту. Баян бувну бия шаэрнал назмурдал, суратирттал ва произведениярттаясса инсценировкарттал бяст-ччал, чичин ккаккан бувну бия шаэрнал творчествалун хас дурсса сочиненияртту.

ХIадур дурну дия авадан­сса программа.
Шикку сурат дишаврил номинациялий хьхьичIун ливчунни ва лицейраву 8-мур классраву дуклакисса Хъусращиял шяравасса Малика Маликова. Ва дуклай бур лавайсса кьиматир­ттай. Ххирар ванин луттирду ккалан, назмурду чичлан, занай бур жура-журасса кружокирттайн. Ванил дирхьуну дия бургъил чанна ла­хъан дурсса някIсса ссав, щюллишиврувун бахьлавгсса зунттурду ва зунтталчунал лаххиялувусса шаэр. Суратрайгу чивчуну бия ниттихъан шаэрнал хас був­сса язими ххару:

Кьариртун дакIниву
цIалайсса къюву,
Лагай аьпалухьхьун
жула ниттихъул.
На лаизлай ура,
дунъяллул оьрчIрув —
Ядувара нину,
сагъну дуссаксса…

Жюрилул, сурат дишавугу, зунттал тIабиаьт ва шаэрнал творчествалул бутIа цалащан бавугу хIисавравун ларсун, ва лайкь бунни димломран ва грамоталун.
Хьхьи­чIун ливчусса дуклаки оьр­чIангу МахIачкъалаллал шагьрулул бакIчинал буржру биттур буллалисса Ризван Гъа­зимахIаммадовлул буллунни дипломру ва бахшишру.
– МахIачкъалалив 2003 шинал укунсса батIавуртту чIярусса дикIантIиссар.

Ва конференция тIурча, ца яла яргмунин ккалли дан бучIир. На барчаллагь тIий ура лицейрал коллективрахь, бивхьусса захIматрахлу, ва дуклаки оьрчIахь, гъирарай гьурттушиву даврихлу. ДакI дарцIуну ура Дагъусттаннал БакIчи Сергей Меликовлулгу, ва даву янилун ларсун, лайкьсса кьимат бищунтIишиврий, «Гамзатовские чтения» конференциялунгу республикалул статус дулунтIишиврий, – увкунни Ризван ГъазимахIаммадовлул.
Дуклаки оьрчIаща тIурча, бювхъунни цана ххирасса шаэрнал творчествалул биялагу, Дагъус­ттаннал аьдатру-эбадатругу кка­ккан дан.