Апрель зурул 6-нния байбивхьуну, МахIачкъалалия аэропортрайн занантIиссар пассажиртал ххилансса транспорт. Январь зурул 25-нний ДР-лул БакIчи Сергей Меликовлущалсса тIайланнасса эфирданий бувсса хIукмурдавасса цану бур МахIачкъалалия аэропортрайн агьали ххилансса транспорт щаллу даврилмур масъала. Ва хIукму дузрайн буккан баву мурадрай, ДР-лул Транспортрал ва ххуллурдал хозяйствалул министерствалул МахIачкъалалия аэропортрайн пассажиртал ххилансса 4 автобус личIи бунни. Автобусру бур уттизаманнул тIалавшиннардал дузал бувсса, 22 инсан щяикIансса кIантту бусса.
КIивагу чулухунмайсса графикрайн бувну автобусру занантIиссар ссят 06:00-нния 21:00-нийн бияннин.
Автобусирттал дайдихьулул ликказан дикIантIиссар Имам Шамиллул цIанийсса проспектрайсса «Этажи» машлул центрданийн тIайлану. Автобусирттал маршрут дикIантIиссар Имам Шамиллул цIанийсса проспектрайх, ХIажи Булачлул цIанийсса кучалийх ва Каспийск шагьрулийнсса цIусса трассалийх аэропортрайн бияннин.
МахIачкъалалия аэропортрайнсса автобусрал багьа бур 100 къуруш.
