Итникьини «Дагестанская правда» кказитрал редакциялий хьунни «Маяки дружбы. Башни Кавказа – 2022» тIисса Халкьуннал дянивсса волонтертурал проектрал сакиншинначитуращалсса пресс-конференция.
Вайннал бусаврийну, августрал 3-нния 13-ннин Аьрасатнал личIи-личIисса регионнаясса волонтертал бучIантIий бур Ухссавнил Ккавкказуллайсса шанна республикалийсса – Дагъусттаннайсса, Ингушнавусса ва Ухссавнил АьсатIиннавусса тарихрал кIанттурду ккаккан.
Проектрал мурадрая ва уттинин цала дурсса давурттая журналистътурахь бусан бувкIун бия ДР-лул Миллатирттал политикалул министерствалул управлениялул каялувчи МахIаммад Даитбегов, «КIулшивуртту» тIисса направлениялул хъунмур Загьида Садикьова ва Дагъусттаннаймур «Маяки дружбы» тIисса ячейкалул бакIчи Хасбат Тилакаева.
Загьида Садикьовал бувсуна «Маяки дружбы. Башни Кавказа» тIисса ва проект Аьрасатнаву щурущи дурну душиву 2016-ку шиная шиннай. Проектравух Дагъусттанналми жагьилтал хIала бувххун бур 2017-ку шинал. Ванил мурадгу бивкIун бур личIи-личIисса регионнаясса жагьи-жугьулт цаннащал ца кIул бувну, дустал бансса. Гания шиннай проектрал дазурдугу гьарта-гьарза хьуну, ванивух гьуртту хьун ччисса жагьилтурал ккурангу хъунна хьуну, чIявусса жагьи-жугьултрал дяниву дусшиврул арарду хIасул хьуну дур.
МахIаммад Даитбеговлулгу бувсуна, Миллатирттал политикалул министерствалул Дагъусттаннаймур проектрал ялув зунсса оргкомитет сакин бувну бушиву Жагьилтурал иширттаха зузисса министерствалул ва Туризмалул министерствалул пишакарталгу цачIун хьуну. Мукунна вайннал цала бакIрайн ларсун дур проектрая буслансса информациялулмур давугу.
Ялув кIицI бувсса куццуй, Ухссавнил Ккавкказуллайсса шаннагу республикалул тарихийсса кIанттурду ххал бувну, личIи-личIисса экологиялул, культуралул ва цаймигу арардал давуртту дурну махъ, экспедициялул циняв вакилтал бучIантIиссар Дагъусттаннайн аьдатравун дагьсса «Вечер Дружбы» тIисса махъра-махъсса шадлугъ кIицI лаган. Шикку вайннал командарттал хIадур дурсса видеороликругу ккаклай, гайннува яла хьхьичIунми язи дугьлагьисса, гайннул автортал лахъа-хъун буллалисса ва мукунна цаймигу тяхъасса шадлугъру дуллалисса хIасиллал мероприятиялийну лакьайсса дур ва проект.
