Махъ ливчIунни Махъва-махъсса гюнгутIигу, нину-ппу ва оьрчIру вас-ццахлий бивкIсса ПаччахIлугърал Цасса Экзаменнугу. Гьашину Дагъусттаннай ЕГЭ дуллуссар 11 азарунния ливчусса выпускниктурал. Вайннава яла лахъсса баллу лавсъссар 29 оьрчIал.

Дагъусттаннал школарттал 1600-нния ливчусса выпускниктурал ЕГЭ-рай лавсъссар 200-нния 300-ннийн биянсса баллу. Ца душ тIурча, кIийлва хьуссар «стобалльница».
ПаччахIлугърал экзаменну дуллай бивкIссар 64 пунктрай, вай дулаврил ялув зий ивкIссар 235 пишакар. Жулла республикалий чIявуссаннал дуллуссар обществознаниялул ЕГЭ. Яла лахъсса баллу бусса чIяруми давурттурив хьуссар оьрус мазралми – 30-ннива 13. Ялагу 9 оьрчIал 100 баллданунну дуллуссар химиялул ЕГЭ, биологиялулсса – 4, физикалулсса – 1, профильная математикалулсса – 1, литературалулсса – 1, информатикалул ва ИКТ-лул – 1.

ЕГЭ-рал дянивмур баллданува яла лаваймур хьуссар ­оьрус мазралсса – 53, 99 балл. Яла лагьмур хьуссар географиялулсса – 39,09 балл.
Профильная математикалул дянивсса балл хьуссар 43,7, обществознаниялулсса – 42,96, литературалул – 49,03, химиялул – 41,1, физикалул – 42,1, тарихрал – 41,5, ингилис мазрал – 49,2, информатикалул – 45,8, биологиялул – 44,5.

Дагъусттаннай увагу ца выпускник хьуссар най дуна кIира дарсирал ЕГЭ-рал «стобалльник» хьусса – Табасараннал райондалийсса Татильскаллал СОШ-рал выпускница Гаваханум МахIаммадова. Душнил ттур-ттуршва баллданун оьрус мазрал ва биологиялул ЕГЭ-рду дуллуссар.
Цила чIумал ЕГЭ дулун къавхьуминнаща му дулунсса, цалва аттестат ласунсса ца чIун ттигу ккаккан дурну дур – ссуттил, сентябрьданул 6-19-нний.