Москавуллал Миллатирттал къатлуву дунни Медициналул зузалтрал кьинилун хас дурсса «Уттизаманнул вирттал» тIисса мероприятие.

Ва даврил сиптачитал бия Аьрасатнал Медициналул зузалтрал ассоциация ва жяматийсса активистътал: медициналул элмурдал доктор, И.М. Сеченовлул цIанийсса Цалчинмур МГМУ-лул лажиндарал хирургиялул кафедралул профессор Астемир Шайхалиев, медициналул элмурдал доктор, профе­ссор, офтальмолог, Аьрасатнал Президентнал Постпредстволул Жяматийсса советрал член, ДГМУ-рал кафедралул учебная частьрал заведующая Сакинат Хархарова-Маккаева, «Аьрасатнал ниттихъул» тIисса жяматийсса дастталугърал хъунмунил хъиривмур, ПаччахIлугърал Думалул депутат Ризван Кьурбановлул кумагчи, Исламрал бизнесрал дунияллул халкьуннал дянивсса ассоциялул (МАИБ-рал) Президент Марат Кабаевлул маслихIатчи (онкологиялул къашавайсса оьрчIал масъалар­тталсса буллалисса) Разита Мусаева ва Москавуллал Культуралул центрданул вице-президент БатIи Оьмарова. Медициналул зузалт барча буван бавтIун бия Москавлив зузисса, яхъана­хъисса, ватандалущалсса дахIаву тачIавгу хIура дуккан къаритлатисса дагъусттаннал агьлугу, хъамалгу.

Медициналул зузалт барча буллалисса ихтилатру бунни медициналул элмурдал доктор, профессор, РАН-далул член-корреспондент, Аьрасатнал элмурдал лайкь хьусса ишккакку, Аьрасатнал ХIукуматрал премиярттал лауреат Сяъдуллагь Абакаровлул, Сакинат Хархарова-Маккаевал, Москавуллал медициналул палаталул председатель, Дунияллул халкьуннал дянивсса Элмурдал академиялул Президент Надежда Журавлевал, Москавливсса Да­гъусттаннал Культуралул центрданул президент, авиациялул-ракетирттал системарттал профессор, техникалул элмурдал доктор Арсен ХIусайновлул, Постпредстволул Жяматийсса советрал председатель ХIамзат ХIамзатовлул, БатIи Оьмаровал. Дагъусттаннал халкьуннал артистка, Аьрасатнал лайкь хьусса артистка Фаина Графченкол цилва зумуну бюхханну, асар хьунну барча бувна ва къабигьасса ппурттуву, жагь ковидрал ххяппурттаща, жагьгу Украиннавусса аьралий иширттаву гьуртту хъанахъисса талаталт щавурдал ххутIаща ххассал буллалисса медициналул зузалт. СВО-рал зоналий сивсуну зузи­сса, талаталт ххассал буллали­сса виртталсса хIакинтуравасса 17-ннан дуллуна Дагъусттан Республикалул Медициналул зузалтрал профсоюзрал чулухасса ХIурматрал грамотартту. Москавливсса дагъусттаннал агьалинан медициналул ка-кумаг буллалисса ва давриву хьхьичIунну зузисса 14 медициналул зузалан ХIурматрал грамотартту дуллуна Исламрал бизнесрал дунияллул халкьуннал ассоциациялул цIанияту. Ковидрал пандемиялул ппур­ттуву хьхьу-кьини личIи къадурну азарданул къизгъинсса фронтрай зий ивкIсса 13 хIакиннан Москавуллал Культуралул центрданул чулухасса ХIурматрал грамотартту дуллуна. Вара центрданул цIаниятусса «Дагъус­ттаннайн дакI тIайлашиврухлу» тIисса медаллу дуллуна Дагъусттаннал Медициналул зузалтрал профсоюзрал хъунмур Зумруд Бучаеван, Сакинат Хархарова-Маккаеван ва А.В. Вишневс­кийл цIанийсса Хирургиялул эл­мийсса институтрал (ФГБУ НМИЦ) ортопедиялул ва артрологиялул отделениялул хъунама, медициналул элмурдал доктор Багавдин АхIмадовлун. Наградартту дуллалисса бутIул хъирив дия ххуйсса концертрал программагу, бия хъамал сахаватну хъамалу бувансса ссупрагу.
– Мяйжаннугу хъуннасса хъар ларсун най бур хIакьину медициналул зузалт, жунна цинявннан кIулсса захIматшивурттайн бувну, вайннан бигьану ба­къар, мунияту ва мероприятиялул сиптачитурал гьанумур мурадгу медициналул зузалтрал дакIру тирх учинмур бувавуя. Миннал хIурмат жучIава лахъну бушиву ккаккан бувавуя. Масалдаран, Мусаева Дина Украиннавусса госпитальдания тIайланма бувкIунни учирчагу тIайлахьунссар. Ванингу, ванищалсса хIакинтурангу кIулли цивппа аьралий ишир­ттал цIараву бушиву, цалами ­оь­мур­дангу нигьачIинна душиву. Амма вайннан щавурду дирминнал аьзаврду рахIат дуваврияр хъунмасса мурад цамур ба­къар цIана. Укунсса инсантурахь барчаллагь учин жулва адаврал буржри. ХIалу дагьнура кIицI лаган, хъунмасса барчаллагьрай бура ва даву лавайсса даражалий дуван биялсса захIмат бивхьусса Астемир Шайхалиевлуйн, Сакинат Хархарова-Маккаевайн ва Разита Мусаевайн, – увкунни БатIи Оьмаровал жул коррес­пондентнахь телефондалувух.