ЦIусса дуккаврил шин лайкьну хьунадаркьунни Ккуллал райондалул щархъавусса цинявппагу школардай.

Сентябрьданул 1-нний дуккаврил шинал дайдихьу дуллалисса линейка хьунни Аьрасатнал Виричу Халид Мурачуевлул цIанийсса Ккуллал 1-мур школалий. Гьашину школалийн бувкIунни 105 оьрчI, миннава13 – цалчинмур классравун.
КIулшивурттал кьинилун хас бувсса мажлис тIивтIуна школалул директор МахIаммад Чариновлул.
– Ххирасса оьрчIрув, хIурмат бусса учительтал ва нину-ппу! ЧIа тIий ура зунгу, зул оьрчIангу цIакьсса цIуллушиву, оьрмулул ххуллийсса тIайлабацIуртту, оьрчIал хьхьичIуннайшивурттал ххари буллай битаннав. Умуд бур ва школалий ххуйсса кIулшивуртту ларсун, школалулгу, республикалулгу цIа-кьини бюхттул дансса оьрчIру хьунссар зуяту тIисса.

Учительтурая хъар хъана­хъи­ссар­ оьрчIал хьхьи­чIуннай­шивуртту ва ялун бучIантIимур, минная цукунсса инсантал буккантIиссарив ва цукунсса захIмат бишинтIиссарив республика ва щала билаят лябуккаврил иширттаву. Ттула коллективран чIа тIий ура жаваблувсса ва бигьа дакъасса тарбиялул давриву тIайлабацIу ва ссавур.

Цинявннан кIулсса куццуй, гьашину жула школа апрель зуруй бувсса марххалттанил хъунмасса зарал биян бувну, магъив, чIиртту левкьун буссия. ДакIнийхтуну барчаллагьрай ура тай апатIру хьуния шинмай школа ччаннай бацIан буллай, хъунмасса захIмат буллай бивкIсса зузалтрайн, лекьлакьисса магъайх лахълай, кумаг буллай бивкIсса дуклаки оьрчIайн, школалул коллективрайн, гьарица ишираву чIарав ацIлай ивкIсса Ккуллал райондалул бакIчи Ажуб ХIусмановлуйн. ЛичIинува кIицI лаганна, кьини дурксса чIумал жул тагьар ххал дан, шайсса кумаг бан увкIсса ДР-лул Халкьуннал Мажлисрал председательнал хъиривчу Камил Давдиевлул цIа, – увкуна МахIаммад Чариновлул.

Шиккува кIицI лаган, тIабиаьтрал апатIирттал хъунмасса зарал биян бувну буссия цIувцIу чарттал чIиртту бусса 1935 шинал бувсса Ккуллал 1-мур школалун. Школа бусса куццуй ябаву мурадрай, шивусса ремонт зия къахьуншиврул магъи лекьайхтура хъуними классирттал дуклаки оьрчIру дакьин дуллай бивкIссар. Утти тIурча, ва магъи цIуницIакул даххана дурссар. Школалий лайкьсса шартIру хIасул дан хъунмасса захIмат буллай ур МахIаммад Чаринов.
Виричунал цIанийсса школалул дуклаки оьрчIругу, коллективгу барча бан увкIун ия Ккуллал райондалул КIулшиву дулаврил управлениялул хъунама Жамалуттин Оьмариев.

– Ххирасса оьрчIрув! Школалийри жува кIулшивурттал гьану бизайсса, школар кIулшивуртталгу, тарбиялулгу бакIщаращи. Цуксса аькьлу-кIулши дусса, итххярхсса дурив ялун нанисса ник, муксса чаннасса бикIантIиссар жулва бучIантIимур. Зуйн, зул кIулшивурттайн ва бюхъу-бажарданийн хъар хъанахъиссар жула бучIантIимур. ХIарачат бувара, ххуйну дуклай, оьрмулул ххуллийх сивсуну бачин, – увкунни Жамалуттин Оьмариевлул.

ОьрчIан тIайлабацIу чIа тIутIисса ихтилат бувна хасъсса аьралий операциялий гьуртту хъанахъисса аьраличунал ниттил Сурая Оьмаровал. Дуккаврил ххуллийх цалчинсса шаттирду ласласисса мюрщултрахь бувсуна цуксса гуж ва чани буссарив дуккавриву.
Цалчинмур занг рищуну махъ, хъуними классирттал дуклаки оьрчIахь дирхьуна Къучагъшиврул дарсру. Дуклаки оьрчIахь бувсуна Хъун дяъвилул шиннардий ва цIанасса ппурттуву душманнайн данди бавцIуну, чувшиврий жанну дуллусса жула Вирттаврая ва миннал дурсса къучагъшивурттая.