Январь зурул 31-нний Каспийск шагьрулийсса Республикалул КIулшивуртту хьхьичIуннай даврил центрданий хьунни Педагогнан ва насихIатчинан хас дурсса ларгсса шинал хIасиллу дуллалисса ДР-лул БакIчиначIасса Элмулул ва кIулшивуртту дулаврил советрал заседание. Шикку ххал бивгьунни кIулшивуртту дулаврил система хьхьичIуннай даврил ххуллу-чараннугу.

Ваний гьуртту хьунни ДР-лул бакIчи Сергей Меликов, ДР-лул кIулшивуртту дулаврил министр ЯхIия Бучаев, АьФ-лул Думалул депутат Бийсултан ХIамзаев, ДР-лул БакIчиначIасса Элмулул ва кIулшивуртту дулаврил советрал председатель Елена Павлюченко, Каспийск шагьрулул мэр Борис Гонцов, РОЦ-нул каялувчи Анжела Байрамбекова, республикалул муниципал образованиярттал каялувчитал ва кIулшивуртту дулаврил управлениярттал хъуними.

Центрданул кIирагу зивулул жанахIраву тIивтIуну бия республикалул кIулшивуртту дулаврил идарарттал бюхъу-даража ккаккан буллалисса ххаллилсса майданну. Мюрщисса оьрчIал роботру, вертолетру, самолетру, жамирду батIлатIисса куц ххал шайхту, исват хъанай бия кIулшивуртту дулаврил идарарттал даву лавайсса даражалий душиву ва ххуйсса пишакартал хIадур бансса цинярдагу шартIру хIасул дурну душиву.

Заседание дайдишин хьхьичI Центрданий тIиртIусса выставка ххал дунни Сергей Меликовлул. Цинявппагу май­данначIа ацIлай, дуклаки оьрчIахь цIухху-бусурду буллай, рирщунни суратругу.
Хъирив, заседаниелул даву дайдихьлай, Сергей Меликовлул барчаллагь баян бунни кIул­шивуртту дулаврил ва тарбиялул ххуллий хьхьичIунсса кка­ккияртту чIалачIи дурсса педагогтурайн.

КIицI лавгунни гьарица инсан оьрмулул ххуллийн тIайла ацIан ансса хъунмасса бияла бушиву педагогтурахь ва нитти-буттахь.
– Тарбиялул масъаларттаха зун аьркинссар педагогтал, тарбиячитал, нину-ппу, цинявппа цачIуну. Ттизаманнул кIулшивуртту дулаврил сфералуву хьхьичI бивхьу­сса агьамсса масъалану хъана­хъиссар цайминная хъар дакъа­сса, жяматраву тIалавсса жагьил­сса ник тарбия даву. Хаснува педагогтуралли дуклаки оьрчIан кIулшивуртту дулаврил ва тарбиялул гьану бизлазисса. На навагу, аьраличув хIисаврай, мудангу тасттикь буллан икIара Ватан дуруччин хIадурсса инсантал патриотътал бушиву. Кулпатраву нитти-буттал бивзсса тарбиялул гьану школалий педагогтурал цIакь буллан аьркинссар. ХIакьинусса кьини Аьрасатнал Президентнал жула оьрчIру талихI буну, аякьа дуну хъуни буллансса цинярдагу шартIру дузал дуллай ур.
Украиннал аьрщарай хасъсса аьралий операция байбивхьуния шийнмай 9 дагъусттан­лувнан дуллунни Аьрасатнал Виричувнал цIа. Аьрасатнал Виричув НурмахIаммад ХIажи­махIаммадовлул гьунардания чивчуну буссар Аьрасатнал тарихрал цIусса учебникрай. Вана вайри ялун нанисса никиран пахруну ва эбратну хъанахъи­сса вирттал, – увкунни Сергей Меликовлул.
Шиккува бусан, гьашинусса шинал Аьрасатнал тарих лахьлахьисса лавайми классирттансса учебникирттавун ххи бувну буссар СВО-лул вирттаврал къучагъшиврия бусласисса бутIа.

Сергей Меликовлул кIицI лавгунни, кадрарду хIадур баврил гьану школардай бизан аьркиншиву. ХIакьину вузру арх бувцун бушиву дянивмур даражалул кIулшивуртту дулаврил идарарттая.
Анжела Байрамбековал був­сунни республикалул кIулшивуртту дулаврил идарарттава ва лавай­сса даражалул заседание даншиврул цила каялувшиву дуллалисса центр язи бувгьушиву.

– БувчIлай бур хъинну жаваблувсса даву жуйнна тапшур дуршиву. ХIакьину центрданий тIивтIуну буссар кIулшивуртту дулаврил системалуву хъана­хъисса цинярдагу цIушиннардая, дахханашивурттая бусласисса Республикалул кIулшивуртту дулаврил идарарттал чулухасса 23 майдан. Умуд бур выставка ххал дурну махъ дуккаврил идарарттал даврил опыт кIибачIинсса сант ххишала хьунссар тIисса, – увкунни Анжела Байрамбековал.
– Цума-цагу инсаннан ххуллу тIитIлай бур кIулшивурттал. ДР-лул БакIчиначIа педагогтурал властьрал органнащалсса дахIаву дуллалисса Совет бушиву – му хъуннасса агьамшиву ду­сса ишри. ДакI ххари хъанай дур Дагъусттаннал дуклаки оьрчIру личIи-личIисса олимпиадарттай, конкурсирттай гьуртту хъана­хъисса, кIулшивуртту ласаврих мюхтажсса бушиврий, – увкунни Бийсултан ХIамзаевлул.

– Педагогнал шинал мутталий дурссар тамансса давуртту. 2023 шинал тIивтIуссар 4140 оьрчIансса кIантту бусса 26 оьрчIал багъ, 7576 дуклаки оьрчIансса 17 школа. Ларгсса шинал сентябрь зурул 1-нния шийнмай гьарицагу муниципал образованиелул идаралий тIивтIуссар 149 психологиялул ва педагогикалул класс. Вагу хьунни дуклаки оьрчIан кумагран­сса чаранну.
ХIакьину ва Центрданий хIасул дурсса выставкалийну чIалай бур оьрчIан ххишаласса кIулшивуртту дулаврил ва тарбиялул даву лавайсса даражалий душиву, – увкунни ЯхIия Бучаевлул.

Элмулул ва кIулшивуртту дулаврил советрал заседаниелий гьуртту хьунни лакрал миллатрал 3-гу райондалул администрациярттал бакIчитал, кIулшивуртту дулаврил управлениярттал хъуними.
– Сергей Меликовлул каялувшиву дуллалисса ппурттуву тIивтIунни цикссагу цIусса школарду ва оьрчIал багъру. КIулсса куццуй, Дагъусттаннал республикалий хъинну хъуннасса дур школардал ккал. Мунийн бувну, хьунабакьлай бур учительтал биялну бакъашивруцIун, луттирду чанну бушивруцIун бавхIусса ва цаймигу цIурювкьусса масъалартту. На навагу, педагог хIисаврай, аякьалийн ласлан икIара учительтурал масъалартту, – увкунни Ккуллал райондалул бакIчи Шамил Рамазановлул.

Имара Саидова