Ларгсса ххуллункьини ва цIанилу МахIачкъалалив «Ахмед-хан Султан» тIисса банкетный залдануву хьунни Палестиннавасса лихъачалтращалсса хьунабакьаву. Ва сакин дурну дия «Сила матерей» тIисса хасъсса аьралий операциялий ватандалул ххуллий чувшиврий жанну дуллусса вирттаврал гъан-маччаминнал ккурандалул, Дагъусттан Республикалул Муфтиятрал ва Миллатирттал иширттал министерстволул кабакьаврийну.
Ваний гьуртту хьунни Республикалул министерстварттал ва ведомстварттал, Муфтиятрал вакилтал, Халкьуннал Мажлисрал депутатътал, жяматийсса ва ихIсандалул ккураннал вакилтал, ишбажаранчитал.
Дяъви сававну язиминнацIа хьусса Дагъусттаннал аьралитурал гъан-маччами, ду-думур ду-дунийра кьариртун дяъвилул цIарава лихъа бувккун бувкIсса Палестиннавасса уссурвал, кIивайвагу ца къювулул ва ца дардирал цачIун бувсса, ца ссупралух щябивкIун кIидачIлай бия духIан захIматсса кьурчIишиву. Мазрал учин ччимур ярунниву чивчуну бия.
Шикку ихтилатру бунни ДР-лул миллатирттал иширттал министр Энрик Муслимовлул, муфтийнал маслихIатчи Айна ХIамзатовал, Халкьуннал Мажлисрал депутат ХIасан ХIусмановлул, «Сила матерей» ккурандалул каялувчи Сефижат МахIаммадрасуловал ва чIявусса цайминнал.
«Зу зула ужагърайру бусса», – тIий ия палестиннахь цума-цагу ихтилат буллалима.
Вайннал бувсунни хIакьину Дагъусттаннал ва Аьрасатнал чулуха Палестиннал агьалинан буллалисса кумаграя – Палестиннавун тIайла буклакисса хьуннав, жучIавасса лихъачалтрансса хьуннав. КIицI лавгунни лихъачалтран жучIава ххуллу тIивтIуну бушиву гьарца кIанттай – вай дуклан кьамул бувну бур школардайн ва лавайсса дуккаврил идарарттайн, дузал буллай бур давурттал, бигьану щаллу буллай бур миннал суаллу цIуллу-сагъшиву дуруччаврил идарарттай.
Палестиннал агьалинал чулухасса вакилтурал кIицI лавгунни Газалул аьрщарай хъанахъимунил ялув цала кьянкьасса хIуччагу бувсун, цахлува сивсуну махъ бусансса дунияллул лидертурава увкшиву так Аьрасатнал Президент Владимир Путин. КIицI лавгунни барчаллагьрай бушиву Аьрасатнал ПаччахIлугърал Президентнайн, Дагъусттан Республикалул бакIчи Сергей Меликовлуйн ва Дагъусттаннал агьалинайн.
«Жул къювулух баччибакъулсса, кумаграл ка тIитIин къадансса чув зул аьращарай жун ттигу цаягу бакIрайн къаагьунни», – увкунни вайннал. Вай дуаьрдай бур Дагъусттаннал ва Аьрасатнал билаятраха.
Зулайхат Тахакьаева
