Ларгсса нюжмардий Лакрал театр зана хьунни кIива тIайлабацIусса аьрххилия.
Сентябрьданул 10-нний Саранскрай «Театральная осень» фестивальданий гьурттугу хьуну, тиччава лавгунни Татарнал хъуншагьру Къазаннайн, кIира кьинисса гастроллай. К. Тинчуриннул цIанийсса Татарнал драмалул ва комедиялул театрданул сахIналий ца кьини кIийлва ккаккан бунни Расул ХIамзатовлул произведениярттаясса спектакль «Последняя цена», цувгу бивхьусса шаэрнал 100 шинан хас дурсса мероприятиярттал лагрулий. Режиссер Дмитрий Павлов.
ТIайлабацIусса хьуссар ва спектакльданущалсса гастроллу Грозный, Владикавказ, Элиста, Нальчик, Пятигорск шагьрурдайн. Вай кIицI лавгсса цинявппа шагьрурдайн Лакрал театр уттинингу цимилвагу лавгссар, хIурматрай кьамул бувссар. Саранскрайн ва Къазаннайнсса аьрххирду тIурча, цалчинссар. ТIайлабацIусса аьрххилийну гьарза-гьарта хьуссар Лакрал театрданул гастроллал географиягу, хъун хьуссар лагру, чIяву хьуссар республикалул кьатIувсса тамашачитал.
Сайки 400 тамашачи лагайсса зал бувцIуну бия кIивагу постановкалийн. Спектакльдания махъ Лакрал театрданул каялувчи Бадрижат МахIаммадхIажиеващал хьунабакьин бувкIун бия Татарнал культуралул министрнал хъиривчув Юлия Адгамова. Ихтилат бия ттуршукулул шаэртураву хьхьичIунсса ххуттайсса Расул ХIамзатовлул творчестволия, му дунияллул литературалуву хIакьинугу агьамсса кIанттай душиврия. Юлия Адгамовал барчаллагь увкуна Лакрал театрданул Татарнал театрданущалсса уртакьшиврул дазурду тIитIаврихлу. Татарнал театрданул директор Фанис Мусагитовлул, Бадрижат МахIаммадхIажиевахьхьун Барчаллагьрал чагъаргу буллуну, бувсуна Дагъусттаннайн гастроллай бучIансса пикри бушиву.
Хъиривмур кьини спектакль ккаккан бунни Къазан шагьрулул зума-къирагърайсса «Залесный» магьирлугърал центрдануву.
Спектакль ккаккан бувкIун бия 8-мур классрал дуклаки оьрчIру. Вайннан Расул ХIамзатовлул цIа кIулну дакъая, «Кьурукьру» балай тIурча, кIулну бия.
Магьирлугърал центрданул директор Тимур Юсуповлул бувсуна дуклаки оьрчIахь дунияллул литературалуву ликъаххайсса аьш кьариртсса Расул ХIамзатовлул творчестволул ирсирая. Барчаллагь увкуна спектакль ккаккан бан цала центр язи бугьаврихлу.
Гастроллал лагрулий К. Тинчуриннул цIанийсса Татарнал драмалул ва комедиялул театрданул ва культуралул центрданул жанахIраву дуссия Расул ХIамзатовлул суратирттал ва шеърирдал выставка.
Рана Халимулина:
– ХIакьину на хIайран бунна Лакрал театрданул постановкалул. Хъун хъанахъисса ник тарбия даврил ххуллийсса даву дурну дур Расул ХIамзатовлул шеърирдайхчил. Му жун багьа бищун къашайсса бахшишну хьунни.
Дуклаки оьрчIру бухьурчагу залдануву, чIу-чIитI бакъа вичIидирхьуну бия 2 ссятрай нанисса спектакльданух. Мунил бусласиссар спектакль асар шаврия. Расул ХIамзатовлул шеърирду жунма хIакьинугу ххуллу ккаккан буллай бур. Ми таржума бувну бур дунияллул чIявусса мазурдийн. Бусалардавун багьсса «Кьурукьру» таржума бувну буссар татар мазрайнгу. Му учайссар Альбина Курмашевал.
Спектакль ххал буллай бунува ттун дакIнийн багьунни вай махъру: «Нажагь бястливу дуснал вил дакIнийн щун барча, цуксса цIун хьурчагу, ина га багъишла ити» – багьа бакъасса махъру бакъаривла, туну, вай. Дусшиву бюхттулсса кIанттай дихьлай ур, дусшиву дуруччин оьвтIий ур шаэр. ХIакьинугу на гьарца махъ бюкьлай ххал бав спектакль. Хъунмасса барчаллагь труппалун ва ххаллилсса спектакль жучIан лавсун бучIаврихлу.
Раида Ильина:
– ДакI асардал къявхъ тIий дур хIакьину спектакль ххал бувния махъ. Яла-яла бювххунни ниттин хас бувсса шеърирду. Макь дайгьин хъанай къабивкIра.
Зулайхат Тахакьаева
