Вай гьантрай МахIачкъала шагьрулул мэр Жамбулат Салавовлул лавайсса кьимат бивщунни Дагъусттаннал паччахIлугърал медициналул университетрал 6-мур курсрал студент Даниял Шабановлун.

Ванан шагьрулул администрациялул чулухасса ХIурматрал грамота дуллунни «Движение первых» суккушиндарал даву хьхьичIуннай давриву бивхьу­сса захIматрахлу, «Зарница 2.0», «Вызов первых», «Российская школьная весна» тIисса щалагу Аьрасатнал лагрулийсса жагьилтурал проектирдавух чялишсса гьурттушинна даврихлу.
Шиккува кIицI лаган, 2025 шинал Данияллул билаятрал 68 региондалиясса 220 инсан гьуртту хьусса «Лучший вожатый в России» тIисса щалагу Аьрасатнал конкурсрай гьуртту хьуну, яла цIанихма вожатыйнал цIа лайкь дурссия.
Мунияр хьхьичIгу, билаятрал 89 региондалиясса 400-нния ливчусса вузирдавасса 2500 студент гьуртту хьусса «Твой ход – 2024» тIисса Аьрасатнал студентътурал форумрайгу, Данияллул хьхьичIунсса кIану бувгьуссия.
ДакIнин бутанну, 11-мур классраву дуклакисса ппурттуву Данияллул, 2020-ку шинал, «Большая перемена» тIисса щалвагу Аьрасатнал конкурсрай 1-мур кIану бувгьуну бивкIшиву. Ванан ва конкурсрайгу призран миллион буллуссар.
Даниял вузраву хьхьичIунну дуклакаврицIун, медициналул элмийсса ахттаршиннарду дуллалисса, жяматийсса иширттавухгу чялишну гьуртту хъанахъисса студент ур.
Жула лакку оьрчIал бюхттулсса ххувшавуртту барча дуллай, уттиния тийнмайгу ххарину мунал ккаккиярттая буслан хIадурссару.