«Память гор» тIисса жяматийсса организациялул отделенияртту районнайгу тIитIинсса Сергей Меликовлул сипталийн бувну, ЦIуссалакрал райондалий тIиртIуссия региондалул организациялул кIанттул отделение.
Мунил председательну цIана увчIунни хасъсса аьралий операциялул ветеран, Гьамиящиял шяравасса Садаев Давуд ХIабиблул арс. КIанттул отделение тIитIаву цила чIумал хъин чулий ккавкссия райондалул бакIчи МаматIи ХIамзатовлул. Вай гьантрай райондалул бакIчи хьунаавкьунни Давуд Садаевлущал ва архIал бувкIсса хъамаллуращал: «Доблесть гор» республикалул программалул гьурттучи Юсуп Салибиевлущал ва райондалул Депутатътурал Мажлисрал председатель Аслодин Аслудиновлущал.
Давуд Садаев хасъсса аьралий операция байбивхьуну, цалчинсса гьантрая шихунай Ватандалул мурадру буручлай хьхьичI ххуттай авцIуну ивкIссар. Гьуртту хьуссар Донецкаллал ва Луганскаллал Республикарттал цаппара шагьрурду тархъан бавриву. Аьрасатнал президент Владимир Путиннул хIукмулийну, ванан дуллуссар Къучагъшиврул орден ва «За отвагу» медаль. Давуд мукуна лайкь хьуну ур Суворовлул ва АхIмад- хан Султаннул медальлан. Вай наградартту ванал лайкь дурссар оьрмулун нигьачIаву дусса шартIирдай аьралий бурж бартбигьлай ккаккан дурсса чувшиврухлу. ХьхьичI ва отделениялий каялувшиву дуллай уссия Мирзахан Аьлиев. Ва цIанасса чIумал хасъсса аьралий операциялий ур.
Андриана Аьбдуллаева
