Сентябрьданул 29-нний Аьли Аьлиевлул цIанийсса спорткомплексраву байбивхьунни Агропромышленностьрал форум. Мероприятие тIиртIунни лезгинкалул къищусса макьандалийну.Форумрал экспозиция ххал дан був­кIунни ДР-лул шя­раваллил хозяйствалул ва бакIлахърулул министр Иван Голуб бакIчисса делегация. Ванащал цачIу бия «Теплицы России» ассоциациялул президент Алексей Ситников, ва «Теплицы Дагестана» ассоциациялул каялувчи Арсен Жамалуттинов.
Каялувчитурал ххал бивгьунни республикалул агросектордануву цIусса технологияртту зузи даврил масъалартту ва кьимат бивщунни ккаккиялун дирхьусса цIушиннардал каширдан.
Выставкалул ­лагругу хъу­нна­сса дия:гьашину ца­лла цIуши­ннарду ва хьхьичIуннайшивуртту ккаккан дуллай бия 100-нниха лирчусса компаниярттал. Гьурттучитал бувкIун бия жула республикалия, Аьрасатнал регионная, Белоруснава, Турциянава, Китайнава ва Индиянава.
КьатIувсса площадкалий кка­ккиялун дацIан дурну дия ттизаманнул шяраваллил хозяйствалул техника, цала машинартту ккаккан буллай бия жула билаятрал заводирттал, Беларусьнал ва Китайнал бизнесментурал. Павильоннаву фермертал ва пишакартал кIул хьунни теплицардал хозяйстварттансса щин дишаврил системарттал цIусса оборудованиялущал, гьаннаращал ва ххяххияртту зиянчитураща дуруччайсса затирттащал. Тикку дия агробизнес дузалгу дурну, дачингу дансса гьарзат, багъ бугьаврия тIайла хьуну, теплицардал автоматизациялийн биянцIа.
Форумрал агьамсса бутIану хьунни давуртталмур программа. Гара кьини дузал бувну бия ахъулссаннул ва къюмайтIутIул багъру гьарта-гьарза баврил, ми цIушиннардал ххуллийх бачин баврил масъалартту ххал бигьлагьисса ккуркки столлу, буслай бия цачIара хьун дуллалисса хьхьичIуннайшивурттая.
Мероприятиялий махъ лавхъунни ДР-лул шяраваллил хозяйствалул ва бакIлахърулул министрнал хъиривчу Шарип Шариповлул. Ванал тIимунийну, ва выставкалий Дагъусттаннал багъманчитурал ва ризкьичитурал лалавсунни мюнпатрансса ва давриву аьркинсса хъунмасса информация, утти миннал ми хьхьичIуннайшивуртту ишла дуллантIий бур цала давурттаву.
КIилчинмур кьини Дагестанские Огни шагьрулул Аграрий колледжрал студентъталгу гьуртту хьунни «ДагАгроКаспий – 2026» агропромышленностьрал форумрай.
Ялун буккансса агрономтал ва механизатортал колледжрал директор Маркизат Сулаймановащал цачIу кIул хьунни ххяххияртту дугьавриву хьун дурсса хьхьичIуннайшивурттащал, лархьхьунни жула ва кьатIаллил билаятирттал шяраваллил хозяйствалуву ишла дуллалисса техника, ххал бунни «АлиЯк» ООО-лул дуккан дуллалисса нисирал тIин-тIааьн.
Каспийскалийн нанисса «ДагАгроКаспий» форумрай бартдигьлай бур гьартасса давурттал программагу.
Шарип Шарипов, Алексей Ситников, Арсен Жамалуттинов ва цаймигу гьурттусса ккуркки столлай ххал бивгьунни ххяххияртту дугьаврил ва ризкьи ябаврил масъалартту.Отраслирдал пишакартурал личIину ххал бивгьунни теплицардаву ахънилсса дугьаврил, интенсив журалул багъру бугьаврил, ахъулссаннул ва къюмайтIутIул багъирдаву ва ттизаманнул технологияртту ишла давриву ялун нанисса чIумул хьунтIисса дахханашивурттал масъалартту. ЛичIисса къулагъас дурну дур ччясса ппурттуву ххяххиярттал азарду ва зиянчитал кIул баврил масъаларттах.
Форумрал гьурттучитурал ххал бивгьунни цIушиннарду щурущи даврийну ризкьилия ласаймур гьарза даврил, дикI ва накI зана-кьала дайсса ттизаманнул технологияртту ишла даврил масъалартту, селекциялуву, ветеринариялуву хьун дурсса хьхьичIуннайшивуртту.
ЛичIину ххал бивгьунни Шяраваллил хозяйствалул кооперациялул хIакъиравусса, агрологистика ва агроагрегация лядуккан даврил масъалартту.
ХI. Аьдилов