Ккуллал райондалул администрациялул къатраву хьунни хасъсса аьралий операциялул гьурттучи МахIаммад Кусаевлул нитти-буттащалсса хьунабакьаву.
Шикку гьуртту хьунни Ккуллал райондалул администрациялул бакIчинал бигарду биттур буллалисса Ажуб ХIусманов, Лакрал ва Ккуллал районнал аьралий комиссар Аьли ГъазимахIаммадов, СВО-лул Ветерантурал ассоциациялул председатель, Ккуллал райондалийсса «Память гор» жяматийсса ккурандалул вакил Нураттин Рамазанов.
Аьрасатнал президентнал ХIукмулийн бувну, аьралий бигарду биттур буллай ккаккан дурсса чувшиврухлу МахIаммад Кусаев аьпалул хьуну махъ лайкь хьуну ур Къучагъшиврул ордендалун.
Виричунал орден тапшур дуллай, Ажуб ХIусмановлул райондалул жяматрал чулуха жижара бунни МахIаммадлул нитти-буттахь.
– Жу хIарачат банну зул къюву чансса дунугу лагь даву мурадрай, кумагру буллай, чIарав бацIлан. КIулну бикIияра зущал архIал дард кIидачIлай чIарав жугу бушиву. Хасъсса аьралий операциялий гьуртту хъанай бивкIсса аьралийтурал кулпатирттал чIарав бацIаву, му жул буржри, – увкунни Ажуб ХIусмановлул.
Виричунал канил дугьан нясив къархьусса орден дуллуна ванал нитти-буттахьхьун – Рафиджаннухьхьун ва Надира Кусаевахъахьхьун.
Вайннал арснан дурагу 24 шин диркIун дур. Амма, ванал цала кутIасса оьрму бувтун бур яргну ва ялун нанисса никиран эбратну.
МахIаммад увну ур 2001 шинал июльданул 1-нний Хъусращиял шяраву. Дуклай ивкIун ур Тахакьа АхIмадовлул цIанийсса Хъусращиял школалий. Школа къуртал байхту, дуклан увххун ур Дагъусттаннал Аграр-колледжравун. Аьралуннаву къуллугъ буллай ивкIун ур Бурятиянал Республикалий. МахIаммад аьралуннава зана хьусса ппурттуву, Украиннаву хасъсса аьралий операция байбивхьусса чIун диркIун дур. Ватандалул ялун нигьачIаву дирсса чIумал, пикри къабувну, лавгун ур паччахIлугърал мурадру буруччаврил ххуллий талан. Зуруйсса аьралий хIадуршиннарду лархьхьуну махъ, гьан увну ур Украиннавун. Цалчинсса талатавурттаву ванайн кIусса щаву дирну, хъунмасса хIаллай хъин хъанай ивкIун ур. Ччаннай ацIайхту, цIунилгу аьралий гьалмахтурачIан зана хьуну ур. Хасъсса аьралий операциялий гьуртту хъанахъисса хIаллай, МахIаммадлул исват бувну бур цува Ватандалул хIакьсса патриотгу, ялун нанисса никиран эбратсса къучагъгу, аьралийтурал вихшала дишин лайкьсса дусгу ушиву. Цала оьрмулун нигьачIаву дунугу, щавурду дирсса ва аьпалул хьусса гьалмахтал, цала хъачIунттай бивхьуну, дяъвилул цIарава ­буккан буллай ивкIун ур. Аьралий гьалмахтурал ванайн «чаннаннил дакI дусса къучагъ» учайсса бивкIун бур.
МахIаммадлул махъра-махъсса талатаву хьуну дур 2025 шинал июньдалул 28-нний Донецкаллал Халкьуннал ­Республикалий Катериновка тIисса шяраву. Шикку аьралий бурж бартбигьлай къучагъшиврий жан дуллуну дур ванал.
Къуллугърал бурж биттур буллай ккаккан дурсса чувшиврухлу, МахIаммад лайкь хьуну ур «За отвагу» медальданун ва аьпалул хьуну махъ ванан дуллуну дур Къучагъшиврул орден. Ванал махъ ливчIунни буттал лажин дакIний къаличIантIисса чIивисса арс.
– МахIаммад дуккаврил ва спортрал чулухунай итххявхсса, школалул жяматийсса давурттавухгу чялишну гьуртту шайсса икIайва. Хъинну хIарачат бусса, яхI-къирият дусса оьрчI ия. ХIакьину ва дуклай ивкIсса школалий дуссар ванал суратру дирхьуну, чIюлу дурсса, ­аьралий бурж лавайсса даражалий бартбигьлай ивкIсса къучагънал аьпа абад буллалисса «Виричунал парта», – тIий буслай бур ванал цалчинсса учительница.
Вайннала хъунама арс Руслангу ур хасъсса аьралий операциялий Ватандалул мурадру буручлай.
Барчаллагьри оьрмурдан нигьачIаву дунугу, вас-ццах бакъа Ватандалул мурадру буручлачисса оьрчIан лайкьсса тарбия дуллусса нитти-буттан.

Имара Саидова