Ххамискьини, февральданул 5-нний, МахIачкъалалив Аьрасатнал элмурдал академиялул Дагъусттаннал элмийсса центрданий хьунни республикалул Термино-орфографический комиссиялул лакрал группалул заседание.

Ванил мурад бия лакку мазрал орфографиялул правиларду ххал диргьуну, ми цалийн дурцусса цIусса проект цIакь даву. КIицI лаган, проект Ися Халидович Аьбдуллаевлул правилардал свод гьануну ларсъсса дур. Цаппара правилардал хIакъираву группалул члентал цалийн къабувкIсса кIанттурду ­хьуну, ми уттигу цIакь къадунни.

Пикри хьунни заседаниялий ххал диргьусса кIирагу свод цIанасса ва хъиривсса кказитирттай рищун, ва масъалалия арх бакъасса инсантурал, чичултрал, шаэртурал, мазраха зузисса аьлимтурал ва цайминналгу цала пикри бусаншиврул. Ци чулийгу лакку мазрал орфография Ися Аьбдуллаевлул правилардал сводрайн чул бивщуну цIакь дан аьркиншиврий цалий бавцIунни комиссиялул циняв члентал. Вай кказитрай рирщуну махъ, хьунтIиссар правилардал проектру ххал дигьлагьисса конференция.

Андриана Аьбдуллаева