Дагъусттаннал Халкьуннал цашиврул кьинилун ва Аьрасатнал Халкьуннал цашиврул шинан хасну МахIачкъалалив хъунмасса даражалий хьунни «Хранители традиций» тIисса Дунияллул халкьуннал дянивсса фестиваль.

Ванийн бувкIун бия, так ца Дагъусттанная бакъассагу, щалагу Аьрасатнавасса ва, жущалва бавкьуну, дусшиврий ялапар хъанахъисса билаятирттаясса хъамал-сянаткартал. ХьхьирицI Родоп бульварданий, хъунмасса чятиргу бивщуну, гьарца къулайсса шартIругу дузал дурну, тIиртIуну дия канил сянатирттал ярмарка. Сакин бувну бия мастер-классру. КьатIув паркраву дирхьуну дия Дагъусттаннал районнал ва шагьрурдал хIаятру – гьарца миллатрал аслийсса сянат ва лаххия ккаккан дуллалисса, ссупрарду тIивтIусса.

Итталу дия Лакрал райондалул хIаятгу. Шикку дирхьуну дия ШавкIуллал усру, мусих щаршсса затру. Ссупралий дия дукьрахIан, хьхьахьхьари, кIарттул ччатI, зунттал нис, аьрайн-гьавккури, бакъухъ, чуттурду ва цаймигу миллатрал дукрарду. Магьирлугърал зузалтрал яргсса номердал шиккун кIункIу буллай бия чIявусса хъамал. ЧIарах къабувккунни Дагъусттаннал цалчинма вице-премьер Муслим Телякавов ва туризмалул ва халкьуннал художествалул сянатирттал министр Эмин Мердановгу. Райондалул бакIчинал хъиривчу Эльмира МахIаммадовал бувсунни бусравсса хъамаллурахь лакрал аслийсса сянатирттая.

Тиннай Яруссаннал театрданул хьхьичI шаннагу кьини най дия Дагъусттаннал районнаясса ва Аьрасатнал цайми регионнаясса фольлорданул коллективирдал концерт. Ваний гьуртту хьунни ЦIуссалакрал ва Лакрал районнал творческий коллективрдугу.