Декабрьданул 9-нний «Дагестан» РИА-лий хьунни «ДР-лул Ишбажаранчишиврул ва инвестициярттал агентствалул бартдигьлагьисса чIиримур ва дянивмур бизнесран кумаг баврил мероприятияртту» темалийсса пресс-конференция.
Ваний гьуртту хьунни Агентствалул каялувчинал хъиривчу Исмяил Оьмаров, Инвестициярттал политика бартдигьаврил отделданул хъунмур Мария Жамалуттинова, ДР-лул Ишбажаранчишиврун кумаг баврил центрданул директор Загьират Буттаева, ДР-лул Экспортран кумаг баврил центрданул директор Арсен Мажидов.
Вайннал бувсунни гьашину чIиримур ва дянивмур ишбажаранчишиврул субъектирттан цалва бувсса кумагирттал хIакъираву.
Арсен Мажидовлул тIимунийну, Центрданул экспортрайн буккан бувну бур МСП-лул (Малое и среднее предпринимательство) шанма субъект–ООО «Армада», ООО ПП «Кизляр» ва ЗАО «Сепаратор», вайннул аьмсса контрактру дур 430 азарва долларданунсса. Вай субъектирттал уртакьталну бусса бур Иран, Оман, Белоруссия ва цаймигу билаятру.
Исмяил Оьмаровлул бувсунни ишбажаранчитуран маслихIатирттайнусса ва субсидиярттайнусса кумагру баврия. Мукунма Агентствалул кумаг байсса бур кредитру лахъангу. 2025 шинал субсидияртту буллуну бур МСП-лул 5 субъектран, аьмну 10,3 млн къурушрансса.
Мария Жамалуттиновал бувсунни «ца чIавахьулттил» (принцип «одного окна») даву цукун дачин дурну дуссарив.
Загьират Буттаевал бувчIин бунни ишбажаранчишиврун Кумаг баврил центр цукун зий буссарив ва мунил цукунсса кумагру буллай буссарив цIуну байбихьлахьисса ва зузисса ишбажаранчитуран, ванил бувсунни мукунма СВО-лул гьурттучитуран ва миннал кулпатирттан кумаг баврил программалиятугу.
ХI.Аьдилов
