Щардал шяравусса школалул чIирай тIиртIунни хасъсса аьралий операциялий ватандалул мурадру буруччаврил ххуллий чувшиврий жан дуллусса ХIалимов Аслан Хизрил арснал аьпалул ула. Аьралийчу дакIнин утан бувкIун бия райондалул бакI дургьуми, идарарттал каялувчитал, шяраваллал бакIчитал, шяравучутал ва гъан-маччами.
Дягъулул митинг дайдирхьуна Аьрасатнал ва Дагъусттаннал гимнру щаллу даврия. Муния махъ мармарчарил улттуя пардав дуркьуна райондалул бакIчи Зураб Куччаевлул ва аьралийчунал ниттил Рангина ХIалимовал.
Аслан ва ватандалул ххуллий жанну дуллуцири цинявппагу дакIнин бичин бавтIми ца минутIрайсса пахъгу багьну, муния махъ мармарчарил улттуцI дирхьуна тIутIив.
Зураб Куччаевлул кIицI лавгуна Ватандалул ххуллий жанну дуллуминнал аьпа буруччаву паччахIлугърал хьхьичIунсса ххуттай бушиву.
– Хасъсса аьралий операциялий жанну дуллуми хьуннав, хIакьинугу тийх талатими хьуннав – виртталли, Ватан дуруччаврил ххуллий жаннай хIайп къакусса. Жула буржри тайннал аьпа хIурматрай буруччаву. ХIакьину жува тIитIлай буру Аслан ХIалимовлул аьпалул ула. Ва жула гьарцаннал аьмсса къювур. ДакIнийхтуну жижара буллай ура Асланнул ниттихь, цинявппагу гъан-маччаминнахь. Барчаллагь вин виричусса арс тарбия аврихлу, – увкунни Зураб Куччаевлул.
– Аьпалул ула тIитIаву – му анжагъ аьдатрансса хIурмат бакъар. Му жула ялун бучIантIимунил цIаний жанну харж дурминнал аьпалул хьхьичIсса жула мяърипатрал буржри. Аслан ХIалимов ватан ххирашиврул хIакьсса эбратну хьуссар хъирив нанисса никиран.
Цал цIа жунна абадлий хъама къаритантIиссар, – увкунни райондалул Депутатътурал Мажлисрал хъунама Явсупи ХIамзаевлул.
– Аьралий иширттал ветерантурал ва хIакьину ватандалул мурадру буручлачиминнал цIания учин ччай ура: Аслан – жул уссур, цувгу абадлий жула кьюкьлуву личIантIисса. Жула яла къалагайсса буржри вайнная хъирив нанисса никирахь буслан, вайннал кулпатирттал чIарав бацIлан», – увкунни хасъсса аьралий операциялий гьуртту хъанахъиминнал иширтталсса буллалисса райондалул бакIчинал кумагчи Ярагъи Дандамаевлул.
– Жула учай талатала кIийлар ивчIайсса, куну: цалчин – ккуллалул увтний, кIилчин – илданун хъама ивтний. Жухьра дакъассар ва хъамаитансса ихтияр. Асланнул жан харж дурсса жулла цIанийри – жува оьрчIругу хъуни буллай, паракьатну ялапар хъананшиврул. Жула бурж, ванал аьпа бугу-бурувччуну, хъирив наниминнайнгу биян бавур, – увкунни Щардал шяраваллил бакIчи Мирослав Ибрагьимовлул.
– Барчаллагь хIакьину жущал къюву кIидачIин бувкIминнайн, жул арснал аьпа абад баврил ххуллийсса даву сакин дурминнайн. Ва аьпалул ула хьуннав чиваркIуннал оьрмулух ласайсса дакьаврил лишанну, – увкунни Асланнул гъанчу АьлихIажи Щамхаловлул.
Муния махъ райондалул аьралий комиссарнал хъиривчу Шималин Вагьабовлул бувсунни аьралий мурадру буруччаврил ххуллий ккаккан дурсса чувшивурттахлу Аслан ХIалимов лайкь хьушиву паччахIлугърал ларайсса наградарттан – Чувшиврул ордендалун ва Жуковлул медальданун. Зураб Куччаевлул вай наградартту дуллунни виричунал ниттихьхьун. Ватандалухасса, вирттаврахасса шеърирду бувккунни Щардал школалул дуклаки оьрчIал, увкунни балайрду.
Аслан ХIалимов увну ур 2000 шинал. Шяраву школагу къуртал бувну, аьралий бурж лавхъун махъ ванал хIукму бувну бур цала оьрму Ватан дуруччул къуллугърацIун бахIин. Чирчуну дур шанна шинайсса контракт. Хасъсса аьралий операция байбивхьусса цалчинсса гьантрайва агьну ур хьхьичIххуттайн. Лайкь хьуну ур Аьрасатнал мюхчаншиврул министерствалул чулухасса наградарттан. 2025 шинал апрельданул 28-нний Аслан цала полкрал кьюкьлуву аьралий мурад биттур буллай ивкIун ур Белгородуллал областьрай Демидовка тIисса шяраву. Хъиривмур кьини ца къизгъинсса талатавриву чувшиврий жан дуллуну дур. Увччуну ур Щардал шяраву.
Зулайхат Тахакьаева
