Лакрал театрдануву хьунни Буттал кIанттул цIанийсса Хъунмасса дяъвилул ветеран, чIярусса шиннардий Ц1уссалакрал М. Чариновлул цIанийсса Халкьуннал театрданул каялувчину ивкIсса Аьбдулхаликь Алимовлул суратирттал выставка. Мероприятие хас дурну дия художникнан 100 шин шаврин. Аьбдулхаликь дакIнин утан бувкIун бия ванал оьрчIру, 3-мур – 4-мур никирайн бияннинсса наслу, дустал, чIаххув-чIарах бивкIми, архIал зий бивкIми, гъан-маччами.
Дачин дурну ия мероприятие Дагъусттаннал Чичултрал союзрал лакрал секциялул хъунама Супиян Оьмаров.
Аьбдулхаликь дакIнин утлатисса ихтилатру бунни Дагъусттаннал халкьуннал шаэр Мирза Давыдовлул, чIаххувчу, полковник Амжад Сулаймановлул, жяматийсса ишккакку ХIасан Айгуновлул, ишбажаранчи, дизайнер Минажат ХIасановал, куяв, цIанихсса архитектор ХIажикьурбан ХIажикьурбановлул, арснал Сергей Алимовлул (ЦIуссалакрал райондалул ДЮСШ-рал директор), душваврал Залмул ва Людмилал оьрчIал оьрчIал: Москавлия ва мероприятиялий гьуртту хьун увкIсса Аскандардул, мероприятиялул сакиншинначитуравасса ца Жулианал. Шамилчинмур никирал мюрщултрал бувсунни цIанихсса ттаттал оьрмулия, дурккунни мунан хас дурсса назмурду.
Цинявппагу Алимыч (укун чайсса бивкIун бур хIурматрай Аьбдулхаликьлуйн) дакIнин утлатими буслай бия ванавусса творчествалул гьунардая, кIицI лаглай бия ванал захIмат ххирашиву, дакIнил хъиншиву, аьчухшиву, инсантуращал хIал бакьаву, хъамал ххирашиву.
– Пиш тIий акъа инсаннахь зума къаахъайссия, хъярч-махсартту буллан ххирассия, – тIий, дакIнин утлай бия циняв.
Гьарицама ия Аьбдулхаликьлул яла хъуннамур лайкьшиву цала хъирив укун ххаллилсса наслу кьабитавур тIий. Мяйжаннугу, ва кьини чIалай бия цуксса куннал кув бувгьусса, бавкьусса наслу кьабивтссарив Алимычлул.
Ванал юбилейран хас дурсса ва кьинисса мероприятиялул сиптачитал ва сакиншинначитал хьуну бия ванал оьрчIал оьрчIру.
Цила чIумал, циняв лагма лаган буллай, цачIун буллай, хъунмасса хIарачат байсса бивкIун бур Аьбдулхаликьлул кулпат Ххадижатлул. Утти ниттил хъар лахълай бур хъамал ххирасса Залму.
Ихтилатру къуртал хьуну махъ Аьбдулхаликьлул оьрчIал ва оьрчIал оьрчIал барчаллагь увкунни выставкалий гьуртту хьун бувкIсса цинявннахь.
Хъирив кьинигу ттатта дакIнин утлатисса мажлис бунни оьрчIал оьрчIал «Инт» кафелуву.
Мажлис чIюлу бунни Дагъусттаннал халкьуннал артистътал Жанна Кьурбановал ва Луиза Шахдиловал балайрдал.
Цила чулуха ххаллилсса балай бахшиш бунни мажлисрайн бавтIминнан Карина Далиевалгу.
Андриана Аьбдуллаева
