Иркутск шагьрулийсса суратирттал выставкалий дур ЦIувкIуллал пагьламантуралссагу. Ва щалвагу Аьрасатнал лагрулийсса «ЧIири Ватандалул гид – 2024» тIисса краеведческий конкурсрал хIасиллайн бувну личIи дурсса суратру дур ккакиялун дирхьуну. Конкурсрайн дуркIсса 215 суратрава личIи дурну дур 40, вайннувух машгьурсса пагьламан, гид Камил Маммаевлул суратгу.

«Пагьламантал – цагу, кIиягу инсан акъар. Ва щаллу-ккурккисса династияр. Жу, хIакьинусса пагьламантал, ЦIувкIуллал цIанихсса хьхьуттайхлахъултрал 6-мур никирал пагьламанталлу. Зува пикри бара, архъаннагу дахIин къакIулсса, хьхьуттай ша ласун къакIулсса наслу бур ялун наними. Жулва ппухълуннал жуйнна дурсса вихшала цIакь дуллай бакъару, дунияллийх цIа ларгсса магьирлугъ духлаган дитан най буру. МуницIухва, буссар ирсирай ппухълунная дирсса пагьламантурал искусство духлаган къадитан шаймур буллалимигу», – тIий ур Камил. Ва ххуттал бакIрайма ва цувари. Камил хIарачат буллай ур, ЦIувкIуллал пагьламаншиврул, ххуйсса тIабиаьтрал бияла ишла бувну, шяравун туристътал кIункIу буван, мюрщи оьрчIан хьхьуттай гьунарду буллан лахьхьин буллан. Вава мурадрай хIасул дурну дур ванал «ТаразалучIансса ххуллу» тIисса организациягу, цалва кунмасса мурад бусса инсантурал ка кIидахIаврийну зузи дурсса. «Хьхьуттайхлахъултрал искусство духлаган къадитаврищал архIал, ттул ялагу ца гьанумур мурад – пагьламаншиврул хъуншагьру — 1-мур ЦIувкIуллал шяравалу, «аул-призрак» хьуну, эяллайн дуккан къаритавур, бур проектру, бур мурадру, бур чIарахбацIулт, зий буссару шаймур буллай», – тIий ур Камил Маммаев.

ПатIимат Рамазанова