Лакрал райондалул бакIчи Юсуп МахIаммадовлул каялувшиндаралу хьунни шяраваллал бакIчитуращалсса инттусса призыврайн дагьайсса батIаву.
Ххал бивгьунни призыврал даву аьщуйн щуну чIалансса мурадру ва чаранну.
Райондалул бакIчинал кIицI лавгунни призыврал даву дан багьлай бушиву саргъунну. Хаснура къулагъас дан увкунни аьралуннаву къуллугъ бан гьан аьркиншиврия бусласаврих, му бувчIин буллалисса ихтилатру буллан жагьилтурахь ва вайннал нитти-буттахь.
Шяраваллал бакIчитурайн тапшур бунни:
– военкоматращал дахIаву дуну зун;
– аьралуннаву къуллугъ бан наниминнан ва вайннал кулпатирттан чIумуй баян буван призыврал низамрая ва ккаккан дурсса чIумуя;
– ялув бацIан призыврал даврил.
«Призыврал кампания дачин дан аьркинссар лавайсса даражалий – ва жула аьмсса мурадри. Жува хIарачат бан аьркинссар призывниктуран жула чулухасса аякьа хIисав хьуншиврул, вайннал къуллугъ закондалуцIун бавкьуну биттур хьуншиврул», – увкунни Юсуп МахIаммадовлул.
Аьли ГъазимахIаммадовлул бувсунни призыврал даврия.
Ххал бивгьунни контрактрай аьралий къуллугъ баврийн багьайсса суаллугу. Бувсунни контрактрай къуллугъ буллан наниминнан паччахIлугърал ккаккан дурсса выплатардая.
Контракт чичайхту булун ккаккан бувну бур 1,5 миллион къуруширттал;
500 азарда къуруш дулун ккаккан дурну дур республикалул;
500 азарда къуруш дулун ккаккан дурну дур резерврал полкраву къуллугъ буллан контракт чирчуманан;
400 азарда къуруш дулун ккаккан дурну дур федерал бюджетрава;
200 азарда къуруш ва аьрщи дулун ккаккан дурну дур Лакрал райондалул администрациялул;
контрактрай къуллугъ буллалиминнал зурул хIакь бур 210 азарда къуруш;
300 азарда къурушрайн биян бувну бур «Каспий» батальондалуву хушрай къуллугъ бан наниминнансса хIакь.
Му бакъассагу, ххал диргьунни контрактрай къуллугъ буллан наниминнансса хIаллихшиннарду: аьралийтурансса ва вайннал кулпатирттансса медициналул дузалшинна, кIулшиву дулаврил программартту, коммунал хIаллихшиннарду.
Райондалул бакIчинал кIицI лавгунни контрактрай къуллугъ буллалиминнансса ка-кумаг баву агьамну ккаклай бушиву социал политикалул ва мунил кабакьу буллалишиву региондалул мюхчаншиву цIакь дуван.
Аьли ГъазимахIаммадовлул кIицI лавгунни республикалий щуруй душиву хасъсса аьралий операциялий гьуртту хъанахъиминнансса «Доблесть гор» тIисса программа.
Райондалул бакIчинал шяраваллал бакIчитурайн тапшур бунни агьали контрактрай аьралий къуллугъ буван кIункIу баврил давривух чялишну хIала буххан.
