Жула чурххан иммунитет хъанахъиссар къарал­чигу, буруччаврил малаикгу. Иммунитет чансса хьхьара хьурча, ялун личлан дикIайссар личIи-личIисса цIуцIавуртту.Гьай-гьай, иммунитет цIакь дан хьхьичIва-хьхьичI витаминну канан аьркинни. Ссутнил-кIинтнил чIумал — хъиннува. Мунищала ар­хIал жувагу хIарачат бан аьркин­ссар, ссихIирчи-хIакин укканнин къабавцIуну:

— Заназияра марцIсса гьава бусса кIанттурдайх.
— Дукра дувара ссихIирай (парданий), канакияра ккурчру (гречкалул, ппиринжрал, перловкалул, хъахъулул), ахънилсса ва ахъул­сса. Чара бакъа канакияра хъюруврал дукра, столданий чан мадару чIикIунтIалул, къавахърал, каландалул, къурул, цIил бувсса каландалул дукрарду.

— Ишла буллалияра мудан лаччи, чимус, кураг, ницI ва лимон.
— Махъаллил хьияра дагъ дурсса, газ хIаласса, консервантру бивчусса дуки-хIачIиялия.
Яла колорияртту гьарзами дук­ра дуркуну хъинссар ссят 2 хьуннин.
— Шанан аьркинссар яла чанну 8 ссятрай.
— МарцIсса щинал 1,5-2 литра гьантлун хIачIлан аьркинссар. Так щин хIачIан аьркинссар дукра дукан дачIи ссятрал хьхьичI ягу за дуркуну ссят ларгун махъ.
— Хъинссар кIюрххил ва кьуннил ца-ца чяйлул къуса (дачIра ххю­ттуйн) туртул нагьлил хIачIларчан.
ЦIуллуну битаннав!