Вай гьантрай МахIач­къалалив ашкара бувну бур закондалий бакъа газрал турбардацIун бавзусса 13 чIявуквартирартту бусса къатта ва 7 цивппа заллусса къатта. Ххал бигьавуртту дурну дур газрал ва МВД-лул зузалтрал цачIусса рейдру дурну шагьрулул Советский райондалий.

Закондалий дакъа дурну диркIсса газрал турбардацIун базавуртту дукьан дурну дур, гьарца иширан хасну чивчуну бур миннуя махъ дувансса давурттал хIакъиравусса актру.
Цайнува цивппа газрал сетирдавун хIала шаврил хъуннасса нигьачIаву диян дуллалиссар тай къатраву ялапар хъанахъисса кулпатирттан, цанчирча миннал буручлай бакъанутIий тIалавшиннардал нормарду. Муния нигьачIаву ­дуссар газ экьи лагаврин,цIу дагьаврин ва газ пIякь учаврин. Амма хIисаврайн ласун аьркинни цамургу зат: чIявуквартирартту бусса къатри шагьрулуву гьарза хъанахъиссаксса (точечные застройки), чан хъанахъиссар чIаххувсса къатраву газгу, токгу. Масалдаран, вай ххару чичлачиманал къатлучIа ва махъсса 3-4 шинал мутталий бунни 12 чIявузивурду дусса къатта, минул дур 10 -15 зивурду. Утти токгу, газгу чан хьунни жучIагу, тай цIуну дурсса къатравугу. ЦIуну дурсса къатравусса ттучандалуву тикку ялапар хъанахъисса инсантал аьрзирай бия, ай, жунний токгу биялну бакъар, газгу чансса бакъа буллай бакъар, кIинттул гъилишивугу лап чансса дикIай, токрайсса гъилишиврул пачру лахъангума багьай, тIий. Му мяйжансса затри, жунний дяхтта янна шюшай машина зий бакъар ток биялну бакъатIий. Гьашинугу тамансса рязибакъашивуртту хьунни МахIачкъалалив чирахъру лещаврил хIакъираву, муния соцсетирдавугу бия буслай. Масалдаран, ХIамзат ЦIадассал кучалуву чани бакъа сайки ца нюжмар хьуну дия, чани булайсса бия так кьунниял чIумал 2-3 ссятрайсса.
Ларгсса шинал строительствалул темалун хасъсса пресс-конференциялий ца подрядчикнал бувсуна, МахIачкъалалив 400 чIявуквартирартту бусса къатта ихтияр дакъа бувну, ми кьамул къабуллай буссар,тIий. Миннул бакIрачIан ци бувкIссарив утти щинчIав кIулну бакъар. МахIатталсса зат му бур, шагьрулул администрациялул ихтияр дакъа шагьрулуву къатри дуван ихтияр дакъасса закон дур, амма къатри дуллайнма бур, ми кьамул дуллайгурхха бусса. Токгу, газгу шагьрулий биялну циван бакъассар тIисса суал пресс-конференциялий журналистътурал булурча, жаваб дикIай укунсса: «Шагьрулий ихтияр дакъа микку-тикку къатри дуллай бур, шагьрулувусса токралгу, газралгу сетьру хIисав дурну дуссар 400-500 азара инсаннан, цIанасса ппурттуву бур ца миллиондалуяргу ххишаласса агьали, токрал ва газрал сетьру кугьна хьуну дур, ххишаласса токгу, газгу миннуща бухIан хъанай бакъар, аварияртту хъанай дур, муниятур шагьрулий токгу, газгу биял къахъанахъисса». Му тIайлар, агьали чIяву хьуссар махъсса 20-30 шинал, муниятур ххишала МахIачкъалалив бири-биривсса кIанттурдай къатри дуллан ихтияр къадуллан аьркинсса, токгу, газгу шагьрулул агьалинан биялну бикIаншиврул.
Зу ци чару? Бусира зулами пикрирду ва масъалалул хIакъираву.
ХI.Аьдилов