Гьарца шинал августрал 22-нний жура кIицI лагару Аьра­сатнал Ттугълил кьини. Мудан кунна, ваницIунсса шадлугъру хьунни Лаккуйгу. Гъумучиял оьрчIал библиотекалий хьунни «Аьрасатнал дакI мунил лишаннавур дусса» тIисса цIанилусса ссят. Ва даврил мураднугу бия оьрчIаву цалла паччахIлугърал ттугълихсса хIурматрал, ччаврил асарду тарбия шаву.
Шадлугъ дайдирхьунни Аьра­сатнал Федерациялул гимн лахъаврия. Библиотекарь Сувар Дибировал бавтIминнахь бувсунни паччахIлугърал ттугълил тарихрая, оьрчIащал бунни «Сине-бело-красный» цIанилусса тIуркIу ва паччахIлугърал символикалийн дагьайсса суаллу бусса викторина. Ва кьинилун хасну хIадур дурну дия «Ттул гимн, ттул ттугъ, ттул Аьрасат!» тIисса цIанилусса луттирдал выставка.
ШавкIуллал библиотекалийгу хьунни Аьрасатнал ттугълил кьинилун хас дурсса батIаву. Библиотекалул хъунмур Фрунзина Кьадиевал дуклаки оьрчIащал бунни билаятрал ттугъ хIасул шаврийн, ватандалухсса ччаврийн багьайсса ихтилатру.