* * *
Янналий ккутI хьусса, ххялавгсса кIану чIумуйнусса бащансса мачI дизан бюхъантIиссар, янналул хъислийх ккунукрал кIяламур бувккун, ххялавгсса кIанай му бивхьуну, ялув кIирисса мангъал дирхьуну, цIакь бувну.

* * *
ДикI, къур-чимус дагъ буллалисса чIумал, аьгъушиврул кIунтIру лагма-ялтту къабагьлантIиссар, ягълавлувун чансса цIу бичирчан.

* * *
ТIиртIусса синттарал (клейрал) флакондалул чIутI ялачIингу ишла буваннин къалачIуншиврул, бучIиссар му ххяххиялул аьгъушиврий дахьвасса аьгъу буван.

* * *
КаруннацIасса балугърал, лаччул кьанкь бигьану гьан дуван хьунтIиссар, кару ккарччив шюшай пасталий шюширчан.

* * *
Меж диркIсса, кьакьлан диркIсса накьлил уртту, салатрал чIапIив цIу лагантIиссар, дяркъусса щинаву 1 ссятрайсса битарчан. Хъиннува хъинссар уртту дирхьусса щинавун микIирал кубикру бичирчангу.

* * *
Ччитул чIарарду бигьану датIин бюхъантIиссар, канийх лачIай чул ялунну кай-кай бувсса скотч ишла бувну.

* * *
Бартбису ччитул чIарардацIа марцI буван хьунтIиссар хъартсса синттарал (резиндалул) катIрал кумаграйну.

* * *
ТIахIни-кIичIулуцIасса тIааьн дакъасса кьанкь гьаншиврул, ми шюшин аьркинссар горчицалул ца чяйлул къусагу дирчусса гъилисса щинай.

* * *
Вазалуву дирхьусса тIутIив хъунмасса хIаллай яхьунтIиссар, щинавун аьракьул ца-кIива кIунтI бутIирчан ва ца чяйлул къусаксса качар бичирчан.

* * *
Мебельданийсса ххарцив дахьлаган дуван бюхъантIиссар му мебельданул рангирайсса уссал кремрал кумаграйну.

* * *
Гьарта бувксса футболкалул дарвач цила кIанайн багьантIиссар, хъинну кIирисса щинаву ца-кIира секундрайсса битарчан.
* * *
Кофемолка марцI дуван багьлай бухьурчан, ва даву бигьану дуван хьунтIиссар, мивун чансса ппиринж бивчуну, гьавуну, ми буккан бувну, яла кофемолка калихьулух лирхьуну.

* * *
ДикI, къур-чимус ва цамур дурусайсса тахта тIааьн дакъасса кьункьацIа ва ттангърацIа марцI дуваншиврул, лимондалул сок дуртIуну, 20 минутIрайсса диртун, вилаган аьркинссар.

* * *
Ссая-бунугу наклейкарду бизан баншиврул, миннуйх майонез дурккун, цаппара хIаллавун ххартI буван аьркинссар.

* * *
Ккунукру бигьану марцI буван хьуншиврул, ми шахьлахьисса щинавун чяйлул къуса содалул дичин аьркинссар.

ХIадур бувссар
Бадрижамал Аьлиевал