Мартрал 15-нний Дагъусттаннал ХIукуматрал председатель Аьбдулмуслим Аьбдулмуслимовлул каялувшиндаралу хьунни, хIукуматрал чулуха ка-кумаг бансса, хьхьичIунсса инвестициялул проектру дузрайн дуккан давриха зузисса инвестортал язи бугьлагьисса комиссиялул даву.
Заседаниялий комиссиялул члентурал хIукму бунни ЦIуссалакрал райондалий буллалисса 300 мегаваттрал гуж бусса мурчай электростанциялул строительствалул инвестпроект хьхьичIун ласунсса. Проектрал сиптачиталну бур «ВетроОГК-3» АО.
Совещаниялий бувсунни проект ссайн дирну дуссарив.
ХIакьинусса кьини дурну дур ВЭС буллалисса аьращарал планировкалул документациялул инженер-геодезиялул ахттаршинна.
КьутIи дурну дур мурчай электростанциялун аьркин бансса трансформатордал подстанциярттащал, ларсун дур гихуннайгу строительство дачин дансса ихтияр. Проект жула республикалун хъунмасса мюнпат бусса хьунтIиссар. Шинай электростанциялул буллантIиссар 878,8 млн кВт/ч электроэнергиялул.
ВЭС-рал кIилчинмур ятIап щурущи дурну махъ, шикку зунтIиссар ларайсса квалификация дусса 73 пишакар, цивппагу Дагъусттаннаясса. Шиккува бусан, зузи дурну дур пишакартуран даву лахьхьин дуллалисса, пишалул даража гьаз буллалисса программартту.
Аьбдулмуслим Аьбдулмуслимовлул кIицI лавгунни, ВЭС-рал проект республикалул социал-экономикалул тагьар къулай даву мурадрайсса хъуннасса агьамшиву дусса хъанахъишиву.
– Республикалий иширайну зузи дурсса «ХьхьичIунсса проектру» тIисса проектирдал сияхIравун ххи хьуссар ЦIуссалакрал райондалий буллалисса мурчай электростанциялул проект. Республикалул маэшатраву ва ца яла хъунмур проектну хъанахъиссар. ХIакьину региондалул инвестициялул лагрулул чулухагу ва ца яла хъуннамур проектну хъанай дур. Ветроэлектростанциялул проект дузрайн дуккаврийну республикалул бюджетравун нанисса инвестициярду ххишала хьунтIиссар, – увкунни Аьбдулмуслим Аьбдулмуслимовлул.
ДакIнин бутанну, мурчай электростанциялул гьану бивзшиву 2024 шинал ЦIуссалакрал райондалий. Проект дузрайн дуккан даврил ялув ацIаву дуллай ур Дагъусттаннал бакIчи Сергей Меликов.
«ВетроОГК-3» АО-лул гендиректор Григорий Назаровлул бусаврийн бувну, ЦIуссалакрал райондалий буллалисса ВЭС-рал кумаграйну, Дагъусттан 20% электроэнергиялул дузал бан най бур.
Ва хъанай дур хъуннасса пилотный проект, цурдагу кутIасса чIумул мутталий дузрайн дуккан дуллалисса.
Совещаниялий кIицI лавгунни, мурчай парк баврийну регион хьхьичIунмай шаврин хъунмасса кумаг шаву бакъассагу, шикку ялапар хъанахъисса агьалинан къулайсса шартIру хIасул хъанахъишиву.
Аьбдулмуслим Аьбдулмуслимовлул «ВетроОГК-3» АО-лул каялувчитурайн тапшур бунни энергеснабжениялул нукьсаншивуртту дусса зунттал районнайгу «Зеленая энергетика» программа зузи даву мурадрай, ми районнугу ахттар даву. Григорий Назаровлул цала бакIрайн лавсунни ва масъала дузрайн буккан баву.
Имара Саидова
