Республикалул шагьрурду гужсса гъараллуннил мугьалттаща ххассал буллан багьсса ппурттуву, Ккуллал райондалийн хъун марххалттанул кьини дуккан дурну дия.
Цаппара шяраваллаву ттукIрал тталлу кьатI хьуну бивкIун бия. Марххалттанувух ххуллурдугу бувккун, электриктуран мадарасса захIмат бан багьну бия ччясса мутталий шяраваллу ттукIрал дузал дуван.
Райондалул бакIчи Ажуб ХIусмановлул бусаврийн бувну, азарханалул хъунама хIакин КьурбанмахIаммад Щамхаловлул сипталийну, анаварсса кумаграл номерданийн оьвкуну, связьрайн къабуклакисса мачча-гъаннал тагьар ххал дуван занай бивкIун бур. ЦIа, фамилия ва адрес бувсъсса кIанайн медициналул зузалт занай бивкIун бур. Ванала баян бувна Цалчинмур ва КIилчинмур ЦIувкIравсса, ЦIущаннивсса ххуллурду буккан спецтехника гьан дуршиву. Цалчинмур ЦIувкIуллал шяраваллил хъунама МахIаммад-Расул Илдаровлул бувсуна тракторданул кумаграцIух шяравун ххуллу бувкшиву.
Гьаннайсса, райондалул хъунимигу, агьалигу ца хьуну, марххалттанува буккансса чаранну лявкъуну бушиву чIалай бия социал сетирдайсса суратирттайнугу.
Укуннагу лазундарал луртан сайки духлаглагисса дяинтнил чIумал ризкьичитуран бигьану къабикIай, марххала булувкьуну булларча. Аллагьнал бурувччуну битаннав бала-апатIирттаща!
ПатIимат Рамазанова
