Ахънилсри

Ахънилсри дацIайссар инсаннан дукиялун кIанайгу, дарувран кIанайгу, дуну тIий миннуву, ахъулссаннуву, дикIуву, ччатIуву, накIливу ва цамуниву дакъасса, чIярусса затру инсаннал чурххан аьркинсса. Ахънилсриннуву чIявуссар витаминну, клетчатка, минерал цIу, пектинну. Ахънилсри хъинссар атеросклероз, гипертония, гепатит ва м.ц. къашайшивуртту хъин дангу.
Витамин А буссар щюлли чимусуву, къуруву, помидордануву, салатраву, кьурчIуву. Ва витамин ххуйну лялияйссар аьгъу­шиврущал архIал, мунияту ялув кIицI лавгсса ахънилсриннуя салат дайссар аьгъушиву дуртIуну, бартлищал ягу ххя­ххиялул аьгъушиврущал.
Витамин В чIявуссар хъюрувраву. КIулну бур витамин В бассайсса бушиву щинаву, мунияту ишла дан бучIиссар хъюру шархьсса щингу. Шахьлахьийни, витамин В лияйссар.
Витамин С буссар сайки гьарцагу ахънилссаннуву, нацIу мамашраву, щюлли чимусуву, щюлли хъюрувраву, каландалуву, нувщуву, кьурчIуву. Шашан аьркинссар цал щяивкIун дуркуну къуртал дануксса, лахъи ларгссаксса, кIири дуллалиссаксса витамин С чан шайссар (зия шайссар).
Витамин Е чIявуссар хъюрувраву ва къуруву, витамин Е яшайссар, личIайссар бусса ку­ццуй, кIири дурнигу.
Витамин К буссар къавахъраву, ятIул чIикIунтIалуву, салатрал чIапIаву ва, витамин А кунма, аьгъушивруцIун бакьайссар.
Йод гьарзассар лаччуву, каландалуву, цинк –хъюрувраву, шагьнал лачIаву, шагьнал хъюрувраву.
ЦIуллуну битаннав