Ларгсса тталаткьини МахIачкъалалив «Marwa Resort» тIисса патирханалуву гьашинусса хIажлийн багьайсса масъалартту гьаз бувсса пресс-конференция хьунни. Журналистътурал суаллахьхьун жавабру дуллунни «Марва-Тур» тIисса, хIажлийн наними ххилаххисса компаниялул гендиректор Булат Кьурбановлул.
Ванал бувсунни, дукIу кунма, гьашинугу Аьрасатнал билаятрай хIажлийнсса яла хъунмур квота Дагъусттаннан ккаккан дуршиву, 10 070 инсан хIадурну ушиву хIажлийн ачин. Бувсунни, цайми регионнай кунма, квота дузал къахъанахъисса иш къабикIайшиву, ялунгума, ккаккан бувсса кIантту биял къахъанай, цаппара кIанттурду ххибан къабучIиссарив тIисса тагьар дикIайшиву. Бувсунни визарду чIал дуллалисса ишгу бакъашиву, сайки 99 процент хIажлийн наниминнал визарду дуркIшиву. Саоьдуллал Аьрабусттаннал даву сантирайн рутаншиврул, зурул хьхьичIва визардал дузалшинна дайсса дур, яла инсантал, лечлачи бувну, авара къахъанан.
Дагъусттанная хIажлийн наними биян бансса цалчинсса самолет леххантIий дур майрал 29-нний. Махъунмай занабикIлантIий бур июньдалул 20-нний.
«КIира программа дуссар жул. МахIачкъалалия тIайланна Аьрабусттаннайнсса ва рейсрайнсса багьа 5490 долларди. Дуссар Дубайрал аэропортрай ливккун, яла тичча Маккалив, Мадиналив автобусирттай, машинарттай биян буллалиссагу. Ва рейсрал багьа 4790 долларди. Цуманан цукун къулайну бурив, язи дугьанссар рейсру. МукьцIалла самолет тIайланна ххилантIиссар. Москавлиятугу дикIантIиссар тIайланна шанна рейс. 20-21 гьантлий бувну къуртал буллалиссар хIаж. Цайми билаятирттал хIатта кIива зуруйссагума лахъи дуккан дувай хIаж буллалисса программа», – бувчIин бунни Кьурбановлул.
Бувсунни ванал гьашину Мина даралуву къатрал кIанттайсса чятирдугу бивщуну, кондиционердугу дикIантIишиву.
Ларгсса шинал Дагъусттаннан 10 000 инсаннансса квота ккаккан дурссия, ялагу 1000 кIану ххи бувссия. Аьмну хIаж бувссия 11000 инсаннал. Аьрасатнава хIажлийн хIадур хьуну усса ур 25000 инсан. Доллар гьаз хьушиврийн бувну, хIажлил багьагу цахъис ххира хьуну бусса бур гьашину.
ПатIимат Рамазанова
