«Знание.Герои» тIисса проектрал лагрулий ва Росгвардия сакин хьуну 10 шин шаврицIун бавхIуну, Росгвардиялул МахIачкъалаллал соединениялул аьралийчу капитан Руслан Батаев хьунаавкьунни Дагъусттаннал университетрал студентътуращал ва «Знание» тIисса Аьрасатнал обществалул региондалул отделениялул вакилтуращал.

Мероприятиялий мукунма гьуртту хьунни университетрал ректор Муртазяли Рабаданов, «Знание» обществалул региондалул отделениялул директор Шевкет Крумов, Гуманитарно-педагогический колледжрал директор Мурад Шяпиев. Гьурттучитурал ихтилатру бия жагьилтал Ватан ххирану тарбия баврил хIакъиравусса, жула ватанлувтурал чувшиврия бусласисса.
Мероприятие тIитIлай, ихтилат бунни Муртазяли Рабадановлул.
Ванал кIицI лавгунни студентътуран бувчIин аьркиншиву хасъсса аьралий операция байбишаврил багьана-сававртту. Капитан Руслан Батаевлул бувсунни национал гвардиялул бигардая, ведомствалул аьралийтурал хасъсса аьралий операциялий ккаккан дуллалисса чувшиврия. Ахирданий Муртазяли Рабадановлул барчаллагь увкунни хъамаллурахь ва чIурчIав дунни цIанасса тагьарданий халкьуннал цашиврул бияла хъунмасса бушиврий.
Андриана Аьбдуллаева