Зураб Куччаевлул Барчаллагьрал чагъар буллунни Лида Кьурбанован, хасъсса аьралий операциялун буллалисса
кумаграхлу. Ва буссар Гъумучиял оьрчIал магьирлугърал школалий мусийх гулавати щащаврил дарс дихьлай,
архIалва кружокрайн заназиминнащал маскировочный къерттугу щашлай.
Ми диян дан ва цимилвагу цуппа лавгссар хасъсса аьралий операция нанисса кIанттурдайн.

Зураб Куччаевлул, райондалул оьрмулуву хъаннил агьамсса кIану бугьлай бушивугу кIицI лавгун, барчаллагь увкунни гьарца кьини хъуннасса хъар ларсун най бушиврухлу.
Хъами-душру барча бунни хасну байрандалийн увкIсса Халкьуннал Мажлисрал депутат Марат Илиясовлул, Райондалул собраниялул хъунама Явсупи ХIамзаевлул ва администрациялий зузисса чиваркIуннал. Яла дарчIунни тIутIивгу.

Муния махъ байрандалун хас дурсса хъуннасса концерт хьунни райондалул Магьирлугърал къатлуву. Шиккугу Зураб Куччаевлул ва Марат Илиясовлул барча бунни залданувун бавтIцири хъами-душру. Хаснува дакI аьчух дансса махъру увкунни СВО-лий талатиминнал ниттихъахь, хъаннихь, ссурваврахь ва душваврахь.
Барча бавурттал хъирив Магьирлугърал къатлул зузалтрал ва Гъумучиял оьрчIал магьирлугърал школалул тарбиялувтурал ккаккан дурунни концерт.

Зулайхат Тахакьаева