Медициналул зузалал кьини щалагу Аьрасатнаву кIицI лагай июнь зурул шамилчинсса алхIаткьини. ХIакиннал пиша бур ца яла агьаммур ва жаваблувмур. Ва ххуллу язи бувгьуминнан куртIсса кIулшивурттацIун ва каруннил магьиршивруцIун ляличIину ххишалану аьркинни инсаншиву ва рахIму-цIимигу.
Чансса бакъар лакравугу медицина язи дургьуну, дакI марцIну цала къуллугърал буржру бартбигьлагьисса, цала-цала кIанттурдай бусравсса зузалт. Миннавасса ца ур хIакьинусса кьини Москавлив личIи-личIисса клиникардай зузисса, жагьилсса оьрмулуву хIакиннал лавайсса даража ккаккан бан бювхъусса ЧIяйннал шяравасса ХIажимахIмухъал Жяъпар Павеллул арс.
Увну ур Жяъпар 1992-ку шинал январь зурул 16-нний Каспийск шагьрулий. Байбихьулул классирттаву дуклай ивкIун ур Каспийскаллал гимназиялуву, 5-11-ми классру бувккуну бур буттал шяраву, ЧIяв.
Школа къуртал бувну махъ увххун ур Москавлив Маймонидлул цIанийсса ПаччахIлугърал академиялувун. Шиккува бувккуну бур экстренный хирургнал пиша лахьхьинсса интернатура ва проктолог хьунсса ординатура. Вай шиннардий кIул хьуну, бувцуну бур шиккува ординатуралуву дуклакисса даргиридуш ПатIимат. Вагу лакрал къяртта дусса бур. Буттал нину ЧукIнатусса дур. ПатIимат хирург-маммологну зий бур.
Ординатура къуртал бувну махъ Жяъпар тIайла увккун ур А.А. Вишневскийл цIанийсса госпитальданийн. ХIакьинусса кьинигу госпитальданий экстренный хирургну ур. Жяъпар мукуна зий ур шагьрулул ва хIукуматрал бакъасса клиникардай проктологну.
Шиккува кIицI лаган, «Крокус Сити Холл» залдануву теракт дурсса чIумал, А.А. Вишневскийл госпитальданийнгу бувцуну бувкIун бур щавурду дирсса чIявусса инсантал. Ми гьантрай цала даврил уртакьтуращал хьхьу-кьини къаувкуну зий ивкIун ур Жяъпаргу, цIунцIияртту хьуминнан кумаг буллай. ХIакьинусса кьинигу шикку хъин хъанай бур хасъсса операциялий щавурду дирсса аьралитал.
Цува зузисса кIанттурдай бакъассагу, Москавуллал цайми азарханардайгу, даврил уртакьтурайн увккун, Жяъпардул кумаг бай цIуллу-сагъшиврул ялув хъун шагьрулийн бувкIсса дагъусттанлувтуран, хаснува лакран.
Жяъпар хIакьсса патриот ур. Ххуйну кIулссар лакку маз, гъалгъа бан бакъасса, буккин-чичингу. Мукун бикIангу аьркинхьунссар. Жяъпар ур хьхьичIунсса учитель, лакку мазрал минахур ХIусайн МахIаммадовлул арснал арс. Цала арснангу ванал ттаттал цIа дирзун дур.
Жяъпардул ппу Павелгу чIявучин кIулсса хирургри. Дагъусттаннал медициналул институт къуртал бувну махъ, Белгородрайн тIайла увккун зун, 5 шинай тийх ивкIун ур. Мунияр махъ 10 шинай Каспийскалий ва Лаккуй зийгу ивкIун, МахIачкъалалив занахьуну, шагьрулул 1-мур азарханалий зун ивкIун ур. МукьцIалла шинайн лавхъсса бур ванал хирургнал стаж. ЦIана пенсиялийн увккун ур. Чансса бакъахьунссар дагъусттанлувтураву ванайн бувккун, цIуцIавугу рахIат дурккун, рязину лавгсса.
ЦIуллушиву дулуннав.
Андриана Аьбдуллаева
