Дагъусттаннай хьхьичIавагу, цIанагу жагьилтал ватан ххирану, къучагъну тарбия баву мудангу сийлий дуссар. Буттал КIанттул цIанийсса Хъунмасса дяъвилул шиннардийгу, 1999 шинал Дагъусттаннайн боевиктал ххявхсса ппурттувугу ва Украиннал аьрщарай нанисса хасъсса аьралий операциялул иширттавугу къучагъшивуртту ккаккан дуллай буссар жула вирттал.
ХIакьину хасъсса аьралий операциялийсса аьралийтуравух ватандалул мурадру буручлай бур хIакинталгу. Вайгу хIакьсса вирттавран ккаллиссар. Цала оьрмулун хъуннасса нигьачIаву душиву бувчIлай бунугу, бита-ххитавуртту нанисса кIанттурдая аьралийтурал оьрмурду ххассал буллай, хъуннасса хъар лархъун най бур жула хIакинтал.
Укунсса ххуллу язи бувгьуминнавасса ур Сапижуллагьлул арс Кьурбан Айгунов. Ватандалийн кьини дурксса чIумал ванал ккаккан бунни цува лавайсса яхI-къирият дусса инсан ва хIакьсса хIакин ушиву.
Кьурбан увну ур ЦIуссалакрал райондалийсса ЦIуссалакрал шяраву. Хъуна хьуну ур нахIу-хIалимсса, бавкьусса кулпатраву. Нитти-буттал оьрчIру мюрщину бунува захIмат ххирану, хъуниминнал хIурмат буну, патриот зумуну тарбия бувну бур. Кьурбан мукьва ссил дянивсса ца уссу ур. Ссурвавран ва пахрулун ва эбратрансса уссу ур.
Школагу къуртал бувну, дуклан увххун ур Дагъусттаннал Медициналул академиялувун. Диплом ласайхту, жагьилсса пишакар буттал шяравун увкIун, хIакинну зун ивкIун ур. Хъуннасса жаваблувшиву ва тIалавшинна дусса пиша язи бувгьусса жагьил Заннала хIакинну ляхъан увсса хханссар. Хасъсса аьралий операция байбивхьусса цалчинсса гьантрайва чирчуну дур ванал гьуртту хьунсса контракт. Ниттин, Зайнаблун, арснал кьамул бувсса хIукмулия махъ кIул хьуну бур. Арснал кьянкьа-кьурчIисса хасиятгу кIулну, ва махъаллил ан къашайшивугу бувчIлай, Хъунасса Заннайн аманат увну, тIайла увккун ур арс ниттил.
Кьурбаннун щиннияргу ххуйну бувчIлай бур ватан дуручлачиминнал оьрмурду цаятува хъар хъанахъишиву, аьралийтал хIакинтурал кумаграх мюхтажну бушиву. Цими аьралийчунал щаву куклу дурхьунссар, оьрмурду ххассал бувхьунссар хIакиннал. Циксса бухьунссар ванайн барчаллагьрайсса аьралийтал ва миннал нину-ппу. Гьарицагу инсаннахь дуссар къучагъшиву, къирият, ватандалийн дакI тIайлашиву ккаккан дувансса каши-кьудрат. Айгуновлул цала бюхъу-каши ишла дунни хасъсса аьралий операциялул иширттаву гьуртту хьуну. Ватандалул мурадру буручлай ккаккан дурсса чувшиврухлу Кьурбан лайкь хьуну ур «За волю к Победе» ва «За храбрость» 1-мур даражалул медальлан. ХIакьину, Кьурбан ва кунмасса цаймигу бур жула аьрщарайсса паракьатшиву дуруччаврил цIаний нигь-ццах дакъа талай. Вайри жагьилсса никиран эбратрансса вирттал.
Барчаллагьри оьрмурдан нигьачIаву дунугу, ватандалул мурадру хьхьичI ххуттай бивхьусса оьрчIан лайкьсса тарбия дуллусса цинявппагу нитти-буттан.
Буний Заннал ябувну лякъиннав зу, цинявппагу жула оьрчIру! Лахъи къалавгун, сагъ-саламатну зана хьусса чIун дучIаннав!
Имара Саидова
