Лакрал райондалий хьунни агьамсса иш – Ххюлуссуннал шяраву тIивтIунни, оьрчIру бакъашиврийн бувну, ларгсса шинал лавкьун бивкIсса школа.
Шиккува кIицI бан, «Образование» программалул лагрулий 2024 шинал райондалул хьхьичIвасса бакIчи Юсуп МахIаммадовлул хIарачатрацIух ва школалий дурссар капитальный ремонт. Дурцуссар отопление, щин, канализация.
Школа цIунил тIитIин бювхъуссар райондалул бакIчи Зураб Куччаевлул хIарачатрацIух. Ххюлуссуннал шяравунсса аьрххилул лагрулий социал объектру ххал буллалийни, цIуну ремонт дурсса, дуккаврил шартIру къулайсса школа лавкьун лякъайхту, райондалул бакIчинал анавархъиндарай ва агьамсса иширал ялув совещание дурну, цала кумагчитурайн ва КIулшиву дулаврил управлениялул каялувчинайн тапшур бувуна школа цIунил зузи бансса чаранну лякъин.
Школа тIитIлатIисса шадлугърай гьуртту хьунни райондалул администрациялул ва идарарттал зузалт, шяраваллил агьали, дуклаки оьрчIру.
Гьарза-гьартану школалул тарихрая, хьхьичIунсса выпускниктурая бувсунни директор МухIсин Кимпаевлул.
Зураб Куччаевлул кIицI лавгунни школа цIунил тIитIаврийну шяраву сахла хьушиву 15 учительнансса зузи кIантту.
«Школа цIунил зузи баву хъинну агьамсса ишри. Школа – му аьдадасса къатри дакъар, школа – шяраваллил къюкIри, шяраваллил гьанур. Школа бусса кIанттай оьрмулул аргъ дуссар, бучIантIимур буссар», – увкунни ванал.
Барчаллагь увкунни республикалул бакIчи Сергей Меликовлухь ва кIулшиву дулаврил министр ЯхIия Бучаевлухь дуккаврил шинал дязаннив школа цIуницIа зузи бан бувсса кабакьаврихлу.
Шяраваллил кIанттай школа ябаврил агьамшиврия ихтилатру бунни Райондалул мажлисрал хъунама Явсупи ХIамзаевлул, КIулшиву дулаврил управлениялул каялувчи Сулайман Шагьмиловлул, Ххюлуссуннал шяраваллил бакIчи Сагъир Акаевлул, школалул учитель Гьарун Кунжуевлул, СВО-лул гьурттучи Кьурбанисмяил Абачараевлул, шяравучу Кьурбан МихIадовлул.
Вай кIицI лаглай бия школа бакъасса шяраву жагьилсса кулпатругу бацIлай бакъашиву, мукунсса тагьардануву шяраваллил аргъгу духлаглай, оьрмугу байлитIлай бушиву. Барчаллагьрай бия школа цIунил зузи бан хIарачат бувсса райондалул бакIчи Зураб Куччаевлуйн.
Школа тIитIаврил лишанну хьусса ятIул лента кьувкьуну махъ, Зураб Куччаевлул ххал бунни кIулшиву дулаврил идаралул кабинетру, пищеблок. Жап увкунни педагогтуращал.
Чаннасса, чIавахьулттавух зунттал тIабиаьт хъатлий дирхьуну чIалачIисса, оьрчIал дуккаврин къулайсса ттизаманнул шартIирдал лащу-щаллусса школалул нузру хIайпъяхха лакьин. Ва кьини дарсирдайн увкIун ия ацIния ххюя оьрчI. Райондалул бакIчинал умуд бивхьунни цIусса дуккаврил шинавун дуклаки оьрчIал аьдад ххи хьунтIишиврийн.
ОьрчIахь цалчинсса дарсгу дирхьунни цала Зураб Куччаевлул, чIурчIаву дурунни буттал кIанттух ва ниттил мазрах ччаву дуну лахьлантIишиврий.
Дуклаки оьрчIан тIайлабацIу чIа увкунни Явсупи ХIамзаевлул, райондалул бакIчинал хъиривчу Малик ХIусмановлул, Сулайман Шагьмиловлул.
Школа цIу буккангу бувну, дуккаврил даражагу лавай баву хьхьичIунсса ххуттай ккаклай бур кIанттул властирдал.
КIулшиву дулаврил идара цIуницIа зий байбишаврийну шяраваллил агьали умудрай бур зунттаву оьрмугу цIу букканссар тIий.
Жугу, Ххюлуссуннал жяматращал ва хъуннасса ххаришиву кIидачIлай, чIа тIий буру учительтурангу, дуклаки оьрчIангу тIайлабацIу. Щарний аргъ дизаннав!
Зулайхат Тахакьаева
