Уттигъанну Хъусращиял шяравасса Аскандардул ва Гилерал арс Арслан Билалов увкIунни Американал Прайор-Лейк шагьрулий хьусса LFA 224 турнирдания. Ванал американец Мэттью Адамслущал данди увккун чемпионнал мухIлу ларсунни.
Ва цувагу ялувсса макьалалуву бувсъсса Рамазан Билаловлул арснал арсри.
Арсланнул цалчинсса раундрайва бугъ аврил прием дурну, ух унни цIанихсса спортсмен Мэттью Адамс.
Ванияр хьхьичI, 2025 шинал ноябрьданий хьусса AFC турнирданий Арсланнул Брейден Петерсон бугъ аврил кьяйдалий ух увссия. Профессионал спортрал карьералуву ва цалагу ух къавхьуну, куннил хъирив кув ряххилагу ххув хьуну ур. Ванащал данди увксса американец Адамсгу гужсса спортсмен ур. Вагу ххюйла ххув хьуну, кIийла ух хьуну ур. Пахру бан лайкьсса иш бур жула лаккуоьрчIал укунсса даражалул турнирданий хьхьичIунсса кIану бугьаву. Турнирдай гьуртту хьуншиврул Арсланнул лахъисса, бигьа бакъасса ххуллу бивтун бур. Оьрмулул 24 шин хьуннин лачIун уккаврил спортрахун агьну ивкIун ур. Арслан ХIажи МахIачевлул цIанийсса спортрал школалийн заназисса чIумал, шикку зий ивкIун ур цIанихсса тренер Аьбдулманап НурмахIаммадовгу.
ХIарачат бусса, захIмат бан ххирасса спортсмен итталун агьну, цала командалувун уцлай бивкIун бур. Амма, та ппурттуву Арсланнун ММА-лухун агьансса пикри къабивкIун бур. Цалва бюхъу-гьунар спортсменнал ккаккан бувну бур цал республикалий, яла Аьрасатнал шагьрурдай хьусса лавайсса даражалул турнирдай. Чемпионатирттай хьхьичIунсса кIанттурду бувгьуну, Арсланнул ларсун дур Аьрасатнал спортрал мастернал цIа.
Арсланнул бусаврийн бувну, лачIун уккаврил спортгу кьариртуну, унгу-унгуну ММА-спортрахун агьну ур оьрмулул 28 шинаву. Ванал хIала-ккаласса данди буккавурттал спортравусса карьера дайдирхьуну дур 2022 шинал январьданий хьусса Eagle FC турнирдания. ХIакьину Арслан ур UFC-рал чемпион ХIабиб НурмахIаммадовлул командалуву. Ванал менеджер ур Американаву ялапар хъанахъисса, жула лаккуоьрчI Ризван МахIаммадов ва UFC-лул спортсментурал менеджер Аьли Абдель-Аьзиз.
– Ттула арснал ххувшавурттая ттун цайминнал ттухьва барча буллай байбивхьукунни баяйсса. На хъювсул буклан бикIайшиву кIулну, цува турнирданийн нанишиву ттуяту кьюлтI буллан икIай. Арслан ляличIину спорт ххирасса, спортзалдануву хъуна хьусса оьрчIри. Ва цуваксса оьрчIащал нигь-ццах дакъа, сивсуну лачIун уклан икIайва. Соревнованиярттайнгу байрандалийн куна, рязину ачайссар. ОьрчIнийва спортрахун машхулну икIайва. Жу хьхьичIва Къизилюртлив ялапар хъанай бикIайссияв. Къизилюртливгу чIавасса Арслан дзюдорал спортраву цалчинма икIайва. Яла, дзюдогу кьариртун, лачIун уккаврихун агьуна. Миккугу мудан цалчинсса кIанттурду бугьайва, – тIий, буслай бур Гилера.
БувчIлачIисса зат бур хIакьинусса кьини спортраву спортсменнал гьунардануцIун, итххяххаврицIун чIарав бацIанмигу аьркинну бушиву. Гьарица ишираву бакIцIуцIаву дуллай, Арсланнул чIарав бацIлай бур ванал нину-ппу.
Арслан дакIнийхтуну барчаллагь тIий ур хьхьичIва-хьхьичI цала тренернахь, цала ххувшавурттая дакIнийхтуну ххари хьусса нитти-буттахь, дустурахь ва цинявппагу гъан-маччанахь.
Арслан, ина так ца вила захIматрайнур ларсъсса ва хъуннасса ххувшаву. ЦIуллушиву дуллуннав, ина дуллалимуницIун кабакьиннав, вил буну чил къабацIаннав, гихуннайсса спортравугу циняв ххари буллансса ккаккияртту хьуннав!
Имара Саидова
